Prezident İlham Əliyevin Rusiya səfəri
Prezident İlham Əliyevin Rusiya səfəri
Azərbaycan və Rusiya əlaqələri tarixən bir-biriylə bağlı olan və hal-hazırda müstəqil şəkildə inkişaf edən çoxşaxəli iqtisadi, siyasi, mədəni sahələr üzərində möhkəm əsaslarla qurulub. Azərbaycan Respublikası və Rusiya Federasiyası bir-biri ilə mehriban qonşuluq və iqtisadi tərəfdaşlıq aspektində münasibətlərini bu gün də inkişaf etdirməkdədirlər. Azərbaycan-Rusiya əlaqələri dövlətlərimizin başçılarının siyasi iradəsinə uyğun olaraq hazırda sürətlə inkişaf etdirilir. Ölkələrimizin qarşılıqlı əlaqələrində siyasi münasibətlər də mühüm yer tutur. Azərbaycan hal-hazırda Rusiyanın ən yaxın tərəfdaşlarından biridir.
Bu günlərdə Azərbaycan-Rusiya əlaqələrinin tarixində daha bir səhifə yazılır. Belə ki, Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putinin dəvəti ilə Moskvaya işgüzar səfəri ölkələrimiz arasında münasibətlərin inkişafına yeni və mühüm töhfələrin veriləcəyinin müjdəçisidir
Azərbaycan Respublikasının Prezidenti cənab İlham Əliyev və Rusiya Federasiyasının Prezidenti Vladimir Putin ərsəyə gəlməsində Azərbaycan xalqının ulu öndəri Heydər Əliyevin mühüm rolu olduğu Baykal-Amur Magistralının 50 illik yubiley tədbirində iştirak ediblər. Ulu Öndər Heydər Əliyevin bu nəhəng layihənin ərsəyə gəlməsində mühüm xidmətlərinin yad olunması ilə yanaşı,yubileydə dövlətlərimizin və xalqlarımızın əməkdaşlığının və dostluğunun da daha da möhkəmlənəcəyi və çiçəklənəcəyi vurğulanıb.
Həmçinin Azərbaycan dövlətinin başçısı onu da vurğulayıb ki: “Biz əlaqələrimizin inkişafından çox razıyıq. Artıq iki ildən çoxdur ki, 2022-ci ilin fevralında burada - Kremldə imzaladığımız və əsas siyasi sənəd olan, gələcəkdə münasibətlərimizin ardıcıl inkişafını müəyyən edən müttəfiqlik qarşılıqlı fəaliyyəti haqqında Bəyannamə çərçivəsində işləyirik”.
Azərbaycan və Rusiya əlaqələrinin inkişafı Qafqaz regionunun təhlükəsizliyinin yüksəldilməsində əsas amildir. Hər iki ölkə Qafqazda təhlükəsizliyin təmin olunması üzrə əsas iki ölkədir.
Azərbaycan Respublikasının 44 günlük Vətən müharibəsi və 2023-cü il 19 sentyabr antiterror əməliyyatları nəticəsində öz ərazi bütövlüyünü bərpa etməsi də Rusiya Federasiyası tərəfindən yüksək qarşılanıb və Azərbaycanın tək başına belə hərbi uğurları region üçün sülh və təhlükəsizliyin təminatçısı olduğu qeyd edilib.
Azərbaycan və Rusiya arasında əlaqələrin sürətli inkişafının qarşıdakı dövrdə də uğurla davam etdirilməsi və daha da genişləndirilməsi məqsədilə bu ilin yanvarında “Azərbaycan-Rusiya əməkdaşlığının inkişafının əsas istiqamətləri üzrə 2024-2026-cı illər üçün Yol Xəritəsi” imzalanıb. Gündəlikdə çox məsələ mövcuddur, əsas prioritet məsələlər hər iki ölkənin hər bir sahə üzrə birgə əməkdaşlığı, ticarət dövriyyəsinin daha da artırılması, logistikanın inkişaf etdirilməsi, yükdaşımanın daha təhlükəsiz və səmərəli edilməsi, fəaliyyətlərin stimullaşdırılması və s məsələlər öz əksini tapıb.
Humanitar əlaqələr də Azərbaycan-Rusiya əməkdaşlığında mühüm yer tutur. Hazırda Azərbaycanın 26 ali məktəbində rus dilində təhsil həyata keçirilir, 16 min Azərbaycan vətəndaşı olan tələbə rus dilində təhsil alır. Həmçinin 324 orta məktəbdə təhsil rus dilində aparılır. Bu, onilliklər ərzində xalqlarımızı birləşdirən bütün yaxşı cəhətlərin qorunmasında, dövlətlərarası münasibətlərin bünövrəsini təşkil edən dostluq əlaqələrinin güclənməsində və inkişafında mühüm əsaslardan birini təşkil edir.
Ümumilikdə Azərbaycan və Rusiya münasibətləri hər bir sahə üzrə yüksək səviyyədə inkişafa davam edəcəkdir.
Bu gün Azərbaycan Ulu Öndərin ideyalarını uğurla davam və inkişaf etdirən Prezident İlham Əliyevin rəhbərliyi ilə sürətlə inkişaf edir. Dövlət suverenliyini tam bərpa etmiş Azərbaycan regionda əməkdaşlığın və davamlı inkişafın təmin olunması üçün ardıcıl səylərini davam etdirir. Bu prosesdə Rusiya ilə əlaqələrin inkişaf etdirilməsi xüsusi yer tutur. Prezident İlham Əliyevin Rusiyaya işgüzar səfəri məhz bu baxımdan mühüm əhəmiyyət daşıyır.
Elvin Zeynalov,
Xəzər rayonu, 149 nömrəli məktəbin müəllimi