Ötən ilin sentyabr ayında biz öz ərazi bütövlüyümüzü, suverenliyimizi tam şəkildə bərpa etdik
Ötən ilin sentyabr ayında biz öz ərazi bütövlüyümüzü, suverenliyimizi
tam şəkildə bərpa etdik
Tarix boyu xalqımız daim öz milli mənəvi dəyərlərini, adət-ənənələrini, tarixi torpaqlarını qoruyub saxlamaq uğrunda mübarizə aparmışdır. Bu mübarizədə xalqımızın yoluna işıq tutan Ümumilli Liderimiz Heydər Əliyevin apardığı siyasətlər nəticəsində Azərbaycan müstəqil Respublika olaraq inkişaf etdi. Bu gün də Ümumilli Liderimizin yolunu davam etdirən Ali Baş Komandanımız İlham Əliyevin apardığı siyasətlərin nəticəsidir ki, işğal altında olan torpaqlarımızın hər bir qarışı yenidən Azərbaycan Respuklikasına, öz sakinlərinə qayıtdı. Xalqımız hər zaman inanırdı ki, Ali Baş Komandanımız və ordumuz, igid əsgərlərimiz, qəhrəman oğullarımız sayəsində torpaqlarımız düşmən tapdağından azad olacaq. Torpaqlarımız uğrunda öz canından keçən, Azərbaycan tarixinin ən gözəl səhifələrini yazan bütün şəhidlərimizin ruhu qarşısında baş əyirik və inanırıq ki, hər birinin ruhu şaddır. Çünki bu gün Qarabağımıza ayaq basan düşmən deyil, öz sakinləridir.
21 dekabr 2023-cü il Azərbaycan xalqı bir daha öz zəfərini yaxından hiss etdi, sanki qələbə sevincini bir daha yaşadı. 21 dekabrda Xankəndi stadionunda futbol üzrə Azərbaycan kubokunun 1/8 final mərhələsində Ağdamın “Qarabağ” və Bakının MOİK komandaları qarşılaşıb. Bu futbol oyununun xalqımız üçün böyük əhəmiyyət daşımasının başlıca səbəbi əlbəttə ki, bu oyunun Xankəndində keçirilməsi idi. Hansı ki, 30 il düşmən işğalında olmuş, şanlı ordumuz tərəfindən işğaldan azad olunmuş Xankəndi. Dövlət Başçımız 21 dekabr Xankəndində çıxışı zamanı qeyd etmişdir: “Torpaqlarımızı 30 il işğal altında saxlayan Ermənistan hesab edirdi ki, bunu əbədi edə biləcək. Biz şanlı Azərbaycan Ordusu onlara və bütün dünyaya sübut etdik ki, bu bizim tarixi, əzəli torpağımızdır. Bu torpaqların sahibi bizik, Azərbaycan xalqıdır. Biz buraya qayıtmalı idik və qayıtmışıq. Üç ay bundan əvvəl Xankəndi işğaldan azad edildi. Bir günlük antiterror əməliyyatı nəticəsində Azərbaycan öz dövlət suverenliyini tam təmin etmişdir. Bu gün bütün Qarabağ bölgəsində Azərbaycan bayrağı dalğalanır. Bu, böyük tarixi hadisədir və bu tarix bizim qəlbimizdə əbədi yaşayacaq. Azərbaycan xalqı, dünya azərbaycanlıları bu Zəfər ilə bundan sonra əbədi fəxr edəcəklər”.
Dövlət başçımız həmçinin keçiriləcək oyun barədə də öz fikirlərini oyundan əvvəl bu cür bildirmişdir: “Bugünkü oyunun nəticələrindən asılıl olmayaraq qalib bəllidir. Qalib Azərbaycan xalqıdır, Azərbaycan dövlətidir!”
Biz də Azərbaycan vətəndaşı olaraq hər birimiz Dövlətimizin daim inkişaf etməsi yolunda böyük uğurlara imza atan Dövlət Başçımızdan öz dəstəyimizi heç bir zaman əsirgəməyəcəyik. Vətənini sevən,onun hər bir qarışı üçün canından keçməyə hazır olan, öz ordusunun, Ali Baş Komandanının hər zaman arxasında duran onu dəstəkləyən bütöv bir Azərbaycan xalqı həmişə var olacaq.
Xəlilova Qumriyyə,
Xəzər rayonu, 149 nömrəli tam orta məktəbin müəllimi
