Azərbaycan – ŞƏT-in mühüm dialoq tərəfdaşıdır
![Image](/uploads/posts/2024-07/prezident-ilham-eliyev-set-plyus-formati-2.webp)
Bu gün Azərbaycanın xarici siyasətində Asiyasi ölkələri, Şərqlə əməkdaşlıq prioritet təşkil edir. Bu mənada ölkəmizin Şanxay Əməkdaşlıq Təşkilatı (ŞƏT) və ona üzv olan dövlətlərlə əməkdaşlığı gücləndirməsi təsadüfi deyil. Dünyanın aparıcı dövlətlərinin üzv olduğu və kifayət qədər nüfuzlu təşkilatı olan ŞƏT Azərbaycanla əməkdaşlığa böyük önəm verir. Ölkəmiz ŞƏT-də dialoq tərəfdaşı statusuna malikdir.
İyulun 4-də Qazaxıstanın paytaxtı Astana şəhərində «ŞƏT plyus» formatında keçirilmiş görüşdə qonaq qismində Azərbaycan Respublikasının Prezidenti cənab İlham Əliyev də iştirak etdı. 3-4 iyul tarixlərində keçirilən sammit çərçivəsində Prezident İlham Əliyev həm ikitərəfli görüşlər keçirib, həm də “ŞƏT plyus” formatında keçirilən görüşdə dərin məzmunlu çıxış edib. Bu çıxış tədbirin mahiyyəti ilə səsləşməklə bərabər, Azərbaycanın belə bir mötəbər görüşə hansı səviyyədə münasibəti olduğunun göstəricisi hesab edilməlidir. Azərbaycan Respublikasının Prezidenti cənab İlham Əliyev çıxışında qeyd etdi ki, 2023-cü ilin sentyabrında Azərbaycan beynəlxalq səviyyədə tanınmış əraziləri üzərində suverenliyini tam bərpa etdi. Bununla da beynəlxalq hüquq və tarixi ədalət bərpa olundu. Azərbaycan Ermənistanın otuzillik işğalına son qoydu və BMT Təhlükəsizlik Şurasının otuz il kağız üzərində qalmış 4 qətnaməsinin icrasını hərbi-siyasi vasitələrlə təmin etdi. Bu gerçəklikləri iştirakçı dövlətlərin dünyanın nizamı baxımından qiymətləndirəcəkləri şübhəsizdir. Qazaxıstanın paytaxtı Astana şəhərində “ŞƏT plyus” formatında keçirilmiş görüşdə Prezident İlham Əliyev bir sıra mühüm məqamlara diqqət çəkdi. Prezident İlham Əliyev hər dəfə nüfuzlu beynəlxalq qurumlardakı çıxışları ilə dünya ictimaiyyətinin diqqət mərkəzində olur.
ŞƏT-i təsis edən 6 ölkə - Qazaxıstan, Çin, Qırğızıstan, Rusiya, Özbəkistan və Tacikistan ayrı-ayrılıqda Azərbaycanda güclü əlaqələrə malikdirlər. Bu ölkələr daim beynəlxalq platformalarda Azərbaycanın ərazi bütövlüyünü dəstəkləyiblər və daxili məsələlərinə qarışmayıblar. Bu amil təşkilatla münasibətlərimizin genişlənməsinə münbit şərait yaradır. Qonşuluq münasibətlərinin gücləndirilməsi, siyasi, iqtisadi və digər sahələrdə səmərəli əməkdaşlıq, regionda sülhün əldə edilməsi, yeni beynəlxalq siyasi və iqtisadi düzənin yaradılması ŞƏT üçün xüsusi önəm kəsb edir.
Astanada “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə”nin qəbul olunub. Bu sənəd iki ölkə arasında münasibətlərin inkişafında yeni mərhələnin əsası kimi dəyərləndirilir. Qazaxıstanın paytaxtı Astana şəhərində “ŞƏT plyus” formatında keçirilmiş görüş dövlətlərarası münasibətlərdə mühüm əhəmiyyətə malik olacaq. Ümumiyyətlə, Azərbaycan hazırda ŞƏT-də dialoq tərəfdaşı statusuna sahibdir. ŞƏT ilə əməkdaşlıq istiqamətləri arasında təşkilatın ənənəvi prioritet sahələri olan və Azərbaycan üçün xüsusi əhəmiyyət kəsb edən terrorizm, ekstremizm və separatizm ilə mübarizə, regional təhlükəsizliyin və sabitliyin təminatı müəyyənləşdirilib. Həmçinin ölkəmizin beynəlxalq müstəvidə mühüm rol oynadığı sivilizasiyalararası dialoq, multikulturalizm və tolerantlığın təşviqi sahələri də diqqət mərkəzində olan məsələlərdəndir.
Mehparə Mansırova,
Bakı şəhəri, Pirallahı rayonu, 243 nömrəli tam orta məktəbin direktoru