MEK-də Xalq yazıçısı Elmira Axundovanın kitablarının təqdimatı keçirilib
MEK-də Xalq yazıçısı Elmira Axundovanın kitablarının təqdimatı keçirilib
Azərbaycan Milli Elmlər Akademiyasının Mərkəzi Elmi Kitabxanasında (MEK)
Azərbaycan Respublikasının Xalq yazıçısı, Əməkdar jurnalist, tərcüməçi,
ədəbiyyatşünas, fil.ü.f.d. Elmira Axundovanın yeni nəşr edilmiş 2 cilddən ibarət
“Aranızda ən böyük dissident mən idim! Heydər Əliyev və yaradıcı ziyalılar”
(«Самым большим диссидентом среди вас был я! Гейдар Алиев и творческая
интеллигенция») və “Ədəbi gəzintilər: Zaman... Süjetlər... Düşüncələr”
(«Литературные странствия: Время… Сюжеты… Мысли») adlı kitablarının
təqdimat mərasimi keçirilib.
Tədbirdə AMEA-nın prezidenti akademik İsa Həbibbəyli, Xalq rəssamı akademik
Ömər Eldarov, Xalq artisti professor Xuraman Qasımova, Azərbaycan Mətbuat
Şurasının sədri Rəşad Məcid, AMEA-nın Nizami Gəncəvi adına Ədəbiyyat
İnstitutunun, AMEA-nın Fəlsəfə və Sosiologiya İnstitutunun, AMEA-nın Mərkəzi
Elmi Kitabxanasının, Azərbaycan Yazıçılar Birliyinin nümayəndələri və KİV
əməkdaşları iştirak ediblər.
Tədbiri giriş nitqi ilə açan AMEA-nın prezidenti akademik İsa Həbibbəyli tanınmış
ədəbiyyatşünas Elmira Axundovanın Azərbaycanda və onun hüdudlarından
kənarda professional publisist kimi qəbul olunduğunu vurğulayıb. Elmira
Axundovanın Ulu Öndər Heydər Əliyev haqqında birinci sənədli bioqrafik romanın
müəllifi olduğunu qeyd edən Akademiya rəhbəri vurğulayıb ki, təqdimatı keçirilən
kitablar bir-birini tamamlayaraq ölkənin görkəmli şəxsiyyətlərinin, ziyalılarının Ulu
Öndərə münasibətlərinə dair müsahibə və oçerkdir, Heydər Əliyev epoxasının
mühiti və müasirləri ilə birlikdə strategiyasını, siyasətini göstərərək unikal
şəkillərlə zəngindir.
Akademik İsa Həbibbəyli qeyd edib ki, yazıçı Elmira Axundova Ümummilli Liderin
siyasi coğrafiyasından bəhs edən çoxcildli əsərləri ilə alternativi olmayan qiymətli
mənbələrin müəllifidir və Dövlət Mükafatına layiq görülmüş 6 cilddə, 7 kitabdan
ibarət “Heydər Əliyev. Şəxsiyyət və zaman” epopeyası onun şah əsəridir.
Daha sonra AMEA-nın Nizami Gəncəvi adına Ədəbiyyat İnstitutunun şöbə müdiri
professor Asif Rüstəmli “Xalq yazıçısı Elmira Axundovanın yeni kitabları: dahi
şəxsiyyətə və əbədi mövzulara yenidən baxış” mövzusunda məruzə ilə çıxış edib.
Tədbirdə, həmçinin Xalq rəssamı akademik Ömər Eldarov, Xalq artisti professor
Xuraman Qasımova, Azərbaycan Mətbuat Şurasının sədri Rəşad Məcid, AMEA-nın
Fəlsəfə və Sosiologiya İnstitutunun elmi işlər üzrə direktor müavini tarix elmləri
doktoru Eynulla Mədətli, AMEA-nın Nizami Gəncəvi adına Ədəbiyyat İnstitutunun
aparıcı elmi işçisi filologiya üzrə fəlsəfə doktoru, dosent Lalə Həsənova və
“Qobustan” jurnalının baş redaktoru Pərvin Nurəliyeva çıxış edərək Xalq yazıçısı
Elmira Axundovanın əsərlərinin Heydər Əliyev irsinin öyrənilməsi üçün dəyərli
mənbə olduğunu qeyd ediblər. Vurğulanıb ki, Heydər Əliyev yaradıcı insanlara
həmişə xüsusi hərarətlə yanaşıb, onların problemləri ilə daim maraqlanıb.
Çıxışlarda, həmçinin müəllifin görkəmli siyasətçinin milli mədəniyyətin
inkişafındakı xidmətlərini hərtərəfli işıqlandırdığı da ətraflı qeyd olunub.
Sonda çıxış edən Xalq yazıçısı, fil.ü.f.d. Elmira Axundova təqdimatı keçirilən
əsərlərinin ərsəyə gəlmə prosesindən danışıb, tədbirin təşkilinə görə Akademiya
rəhbərliyinə və iştirakçılara dərin minnətdarlığını bildirib.
İctimaiyyətlə əlaqələr şöbəsi
pr.mek.az@gmail.com
(012) 539-73-67 ( daxili 14-14)
