Qırğızıstan-Azərbaycan münasibətlərinin keyfiyyətcə yeni mərhələyə qədəm qoyur
Bu gün Azərbaycanın Mərkəzi Asiya, o cümlədən regionun türkdilli dövlətləri ilə kəmiyyət və keyfiyyətcə intensivləşən münasibətləri yeni geosiyasi reallıqlara uyğun olaraq inkişaf etdirilir və strateji xarakter alır. Qırğızıstan, Qazaxıstan, Özbəkistan, Türkmənistanla münasibətlərimiz çoxşaxəli olmaqla bərabər, eyni zamanda, milli-mənəvi maraqlara bağlılığı ilə seçilir. Bunun da ən əsas səbəbindən biri həmin dövlətlərin xalqları ilə ortaq milli-mənəvi dəyərləri bölüşməyimizdir. Türk dövlətləri ilə əməkdaşlığın inkişafı Azərbaycanın xarici siyasətinin, beynəlxalq səviyyədə tərəfdaşlığının prioritet istiqamətlərindəndir. Azərbaycan Mərkəzi Asiya ölkələri arasında Qırğız Respublikası ilə münasibətlərə də böyük önəm verir. İkitərəfli əməkdaşlığın inkişafında dövlət başçılarının səfərləri xüsusilə böyük əhəmiyyətə malikdir. Azərbaycanın Orta Asiyanın türk dövlətləri ilə əlaqələri həmişə geniş olub.
Azərbaycan ilə Qırğızıstan münasibətləri qədim tarixə malikdir. Bundan başqa bu xalqlar dil və din eyniliyi də birləşdirir. Qırğız Respublikasının Prezidenti Sadır Japarov aprelin 24-də Azərbaycana səfəri ikitərəfli münasibətləri yeni səviyyəyə qaldırır. Qırğızıstan təbii sərvətləri, su, dağ-mədən ehtiyatları hələ tam kəşf olunmamış bir ölkədir. Eyni zamanda, Qırğızıstan sərmayə cəlb etməyə hazır olan bir ölkədir. Azərbaycan da sərmayəçi rolunda çıxış edə bilər. Bundan başqa Çinlə sərhəd olması və Türk Dövlətləri Təşkilatının sərhədlərində yerləşməsi Qırğızıstanın strateji əhəmiyyətini artırmaqdadır. Ağdama səfər, verilən mesajlar, mənəvi dəstək, mədəni, humanitar, əlaqələrimizin dərinləşməsi baxımından olduqca əhəmiyyətlidir. Ölkəmizdə az qala azərbaycanlı yazıçı kimi tanınan Çingiz Aytmatovun heykəlinin açılışı da əlaqələrimizin daha da inkişaf etməsinin göstəricisidir.
Azərbaycan və Qırğızıstan arasında münasibətlərin inkişaf dinamikasının yüksək olması ölkərəmizin həm siyasi, həm də iqtisadi münasibətlərinə müsbət təsir göstərir. Qırğızıstan üçün önəmli olan məsələ yeni geosiyasi reallıqlarda əməkdaşlıq imkanlarının daha da gücləndirilməsidir. Bu xüsusda, Orta dəhliz, Zəngəzur dəhlizi, nəqliyyat və kommunikasiya xətlərinin inkişafında öz payını qazanmaq, tranzit imkanlarını daha da yüksəltmək maraqları dayanır. Ona görə də Zəngəzur dəhlizi bütün Orta Asiya dövlətləri kimi, Qırğızıstan üçün də maraqlıdır. Bütün bunlar onu göstərir ki, Azərbaycanın Mərkəzi Asiya ölkələri, xüsusilə Türk dövlətləri, o cümlədən Qırğızıstanla əməkdaşlığının geniş perspektivləri var. Qırğızıstan Prezidenti Sadır Japarovun bu gün Azərbaycana yenidən səfər etməsi iki ölkə arasında mövcud olan münasibətlərdə yeni səhifə açacaq, xalqlarımızın tarixi və mənəvi əlaqələrini daha da möhkəmləndirəcək, mövcud potensialdan tam istifadə üçün böyük addımların atılmasına şərait yaradacaq. Prezident Sadır Japarovun ölkəmizə səfəri, imzalanan sənədlər və liderlərin səsləndirdiyi fikirlər iki qardaş ölkənin münasibətlərində hərtərəfli əməkdaşlığa hesablanan yeni mərhələnin əsasının qoyulduğunu deməyə əsas verir. Bütün bunlar türkdilli dövlətlər arasında qardaşlıq münasibətlərinin inkişafında nümunəyə çevrilir.
Sailə Salahzadə,
YAP Pirallahı rayon Təşkilatının fəalı
