Yeni bir dövrün başlanğıcı
Yeni bir dövrün başlanğıcı
Hər bir tarixi nəticəni yaradan və formalaşdıran mühüm hadisələr mövcuddur. İstənilən nəticəni qaçılmaz edən bir istinad nöqtəsi vardır. Bu baxımdan, bu gün qürur duyduğumuz qüdrətli Azərbaycanın təməli xalqın təkidli tələbi ilə hakimiyyətə gələn Ümummilli Lider Heydər Əliyevin 1993-cü il 3 oktyabr tarixində Azərbaycan Respublikasının Prezidenti seçilməsi ilə qoyulmuşdur. Ümummilli lider Heydər Əliyevin rəhbərliyə qayıdışı yalnız dövlətin möhkəmlənməsi və xalqın birləşməsi üçün deyil, həm də müstəqilliyin qorunub saxlanması və Azərbaycanın beynəlxalq aləmdə mövqeyinin güclənməsi üçün vacib olmuşdur.
1993-cü ilin həmin çətin və təlatümlü dövründə Azərbaycan ciddi daxili və xarici təhdidlərlə üzləşirdi. Ölkədə siyasi və iqtisadi xaos hökm sürür, Ermənistan-Azərbaycan münaqişəsi qızışmaqda davam edir, xarici qüvvələr Azərbaycanın müstəqilliyinə qəsd etməkdə israr göstərirdilər. Belə bir çətin vəziyyətdə xalqın ümidi Heydər Əliyev şəxsiyyətinə yönəlmişdi. İndi siyasi baxışlarından və dünyagörüşündən asılı olmayaraq hər kəs etiraf edir ki, əgər bu həlledici mərhələdə tarixə Milli Qurtuluş Günü kimi daxil olmuş əlamətdar hadisə baş verməsəydi, xalqın istəyi və tələbi ilə 1993-cü il iyunun 15-də Ulu Öndərimizin hakimiyyətə qayıdışı gerçəkləşməsəydi, indi biz müstəqil, qüdrətli, hər zaman tərəqqi edən, yeniləşən və demokratikləşən Azərbaycan dövlətindən danışa bilməzdik. Ümummilli Liderimizin siyasi hakimiyyətə qayıdışı ilə ölkəmizdəki özbaşınalığa, anarxiyaya, xaosa son qoyulub, Azərbaycan 1969-cu ildən başlanan quruculuq xəttinə qaytarılıb.
Beləliklə, 3 oktyabr 1993-cü il prezident seçkiləri ölkə tarixində əlamətdar hadisələrdən biri hesab olunur. Seçkilər zamanı xalqın Heydər Əliyevə olan böyük etimadı açıq şəkildə özünü göstərdi və o, seçkilərdə qələbə qazanaraq Azərbaycan Respublikasının Prezidenti seçildi. Bu hadisə ilə ölkədə siyasi sabitliyin təməlləri qoyuldu və dövlətçiliyin möhkəmlənməsi üçün yeni bir mərhələ başlandı.
Heydər Əliyevin prezidentliyi dövründə Azərbaycanın dövlət idarəçiliyi ciddi islahatlara məruz qaldı, hüquqi dövlət quruculuğu və iqtisadi inkişaf üçün mühüm addımlar atıldı. Onun xarici siyasəti Azərbaycanın beynəlxalq arenada nüfuzunun artmasına, böyük dövlətlərlə münasibətlərin inkişafına və ölkənin strateji mövqeyinin möhkəmlənməsinə səbəb oldu. Xüsusilə enerji sahəsində atılan addımlar Azərbaycanın dünya enerji bazarında önəmli aktora çevrilməsini təmin etdi.
Heydər Əliyevin rəhbərliyi ilə Azərbaycanın müstəqilliyi möhkəmləndi, dövlətin siyasi, iqtisadi və hərbi sahələrdəki gücü artdı. Ümummilli liderin uzaqgörən siyasəti nəticəsində Azərbaycanın müstəqil bir dövlət kimi mövcudluğunun əsası möhkəmləndi və müasir Azərbaycan dövlətçiliyinin qurucusu kimi Heydər Əliyev tarixə əbədi həkk olundu.
Bu gün Heydər Əliyevin dövlətçilik fəlsəfəsi Azərbaycan xalqının milli yaddaşında yaşamaqda davam edir və onun ideyaları Azərbaycanın inkişaf yoluna işıq tutur.
Lamiyə Quliyeva
Pirallahı rayonu, N.S.Teymurov adına 231 №li tam orta məktəbin direktoru
