Səttar Möhbalıyev: “Azərbaycan Şanxay Əməkdaşlıq Təşkilatı üçün vacib ölkədir”
“Dövlətimizin başçısı cənab İlham Əliyevin rəhbərliyi ilə ölkəmizin böyük
nailiyyətlər qazandığı, misilsiz uğurlara imza atdığı istiqamətlərdən biri də onun
xarici siyasətidir. Dəqiq hesablanmış və düzgün qurulmuş Azərbaycanın xarici
siyasi strategiyası milli maraqlara əsaslanaraq ölkələrlə qarşılıqlı anlaşma, hörmət,
demokratik prinsiplər üzərində daim inkişaf edir. Məhz bu effektli siyasət, o
cümlədən ədalətli mövqe, qətiyyətli addımlar dövlətimizi dünyada məsuliyyətli və
etibarlı tərəfdaş kimi tanıdıb, regional liderliyini daha da möhkəmləndirib və
qlobal aləmdə əsas aparıcı aktora çevirib. Eləcə də beynəlxalq münasibətləri həm
nəzəri, həm də praktik səviyyədə dərindən bilən, geniş və məntiqli analitik
təfəkkürə, məqsədyönlü, düşünülmüş siyasi baxışlara sahib olan Prezident İlham
Əliyev istər regional, istərsə də beynəlxalq platformalarda dövlətimizin maraqlarını
yüksək səviyyədə təmin edir. Ən əsası isə odur ki, Azərbaycan heç kimdən asılı
olmayan, tamamilə müstəqil və sərbəst siyasət həyata keçirir. İmza atdığı
beynəlxalq layihələr, irəli sürdüyü təşəbbüslər, həmçinin qlobal sülh və
təhlükəsizliyə verdiyi davamlı töhfə dünya üçün son dərəcə səmərəli olub və
yüksək qiymətləndirilib. Heç də təsadüfi deyil ki, ölkəmiz bilavasitə 155 ölkənin
dəstəyi ilə 2012–2013-cü illər üçün BMT Təhlükəsizlik Şurasının qeyri-daimi üzvü
seçilib. Tərəddüdsüz ifadə edə bilərik ki, bu, Azərbaycanın uğurlu xarici
siyasətinin mühüm əlamətidir. Digər vacib göstərici isə dünyanın ikinci ən böyük
beynəlxalq qurumu olan Qoşulmama Hərəkatına 2019–2023-cü illərdə sədrlik
Azərbaycana etibar edilib. Həmin dövrdə yüksək təşkilatçılıq, nümunəvi və ədalətli
idarəçilik, institusional yeniliklər sayəsində bu beynəlxalq təsisat dünyada böyük
imic qazandı, qlobal çəkisi isə xeyli artdı”.
Bu fikirləri kütləvi informasiya vasitələrinə açıqlamasında Azərbaycan
Həmkarlar İttifaqları Konfederasiyasının (AHİK) sədri, Milli Məclisin
deputatı Səttar Möhbalıyev deyib.
Onun sözlərinə görə, bu gün Azərbaycanın xarici siyasətində xüsusi önəm
daşıyan istiqamətlərdən biri də Şanxay Əməkdaşlıq Təşkilatı (ŞƏT) ilə
münasibətlərdir: “Dünyanın kifayət qədər nüfuzlu təşkilatı olan, ərazi və əhali
baxımdan ən böyük bir neçə ölkəni özündə birləşdirən ŞƏT-lə ölkəmizin əlaqələri
davamlı olaraq inkişaf edir. Bu təşkilatla Azərbaycan arasında əməkdaşlıq
sahələrini nəzərdə tutan memorandum imzalanıb və ölkəmiz ŞƏT-də dialoq
tərəfdaşı statusuna malikdir. Yeri gəlmişkən, burada təmsil olunan və bir araya
gələn, demək olar ki, bütün dövlətlərlə ölkəmizin normal əlaqələri var. Təbii ki, bu
da təşkilatla münasibətlərimizin genişlənməsinə münbit şərait yaradır. Eyni
zamanda qarşılıqlı etimad, qonşuluq münasibətlərinin gücləndirilməsi, siyasi,
ticarət, iqtisadiyyat və digər sahələrdə səmərəli əməkdaşlıq, regionda sülh,
təhlükəsizlik və sabitliyin əldə edilməsi, yeni siyasi və iqtisadi beynəlxalq düzənin
yaradılması kimi ŞƏT-nin məqsədləri Azərbaycan üçün də xüsusi önəm kəsb edir
və ölkəmizin maraqlarına tam cavab verir”.
AHİK sədri Səttar Möhbalıyev ölkəmizin ŞƏT üçün əhəmiyyətini də
xatırladıb: “Bildiyimiz kimi, Azərbaycanın bütün sahələri əhatə edən davamlı
inkişafı, regional güc mərkəzinə çevrilməsi, əlverişli təbii-coğrafi mövqeyi və
təşəbbüskarı olduğu nəhəng layihələrin əhəmiyyəti ölkəmizin bu təşkilatla
əlaqələrinə ciddi təsir edir. Eləcə də tranzit və nəqliyyat-logistika imkanları, Şərq-
Qərb və Şimal-Cənub nəqliyyat dəhlizlərinin fəaliyyətinə göstərdiyi dəstək
Azərbaycanı ŞƏT üçün cəlbedici edir. Orta Dəhliz kimi də tanınan Transxəzər
Beynəlxalq Nəqliyyat Dəhlizinin təşkilat və ona üzv dövlətlər üçün üstünlükləri
böyükdür. Odur ki, Azərbaycanla əməkdaşlıqda ŞƏT daha çox maraqlıdır”.
“ŞƏT-nin budəfəki - Qazaxıstanın paytaxtı Astanada keçirilən Zirvə görüşü
də ölkəmiz üçün yaddaqalandır. Artıq ikinci dəfədir belə mötəbər tədbirə
dövlətimizin başçısı dəvət olunur. Bu, Azərbaycan Prezidentinin şəxsi nüfuzu,
dəyərli fikirlərinin və irəli sürdüyü təşəbbüslərin regional əməkdaşlıq üçün
önəmini göstərir. Zirvə toplantısı çərçivəsində Prezident İlham Əliyev Rusiya,
Qazaxıstan, Türkiyə prezidentləri, Çin sədri və Pakistanın Baş naziri ilə görüşlər
keçirdi, səmərəli danışıqlar aparıldı. Baş tutan bütün görüşlərdə qarşı tərəflər bir
daha Azərbaycanla əməkdaşlıqdan məmnunluq ifadə etdilər, həmçinin əlaqələrin
mövcud və yeni sahələr üzrə inkişafının vacibliyini bildirdilər. Mən “Azərbaycan
Respublikası ilə Çin Xalq Respublikası arasında strateji tərəfdaşlığın qurulması
haqqında Birgə Bəyannamə”nin qəbul olunmasını xüsusi olaraq vurğulamaq
istərdim. Bu, hər iki ölkə arasında münasibətləri yeni müstəviyə daşıyacaq, siyasi,
iqtisadi və mədəni sahələrdə əməkdaşlığı genişləndirəcək. Bundan başqa,
Bəyannamə beynəlxalq məsələlərdə qarşılıqlı fəaliyyəti gücləndirməyə, iki ölkənin
ümumi maraqlarını birgə qorumağa, həmçinin regional və qlobal sülh, sabitlik və
inkişaf fəaliyyətini birgə irəlilətməyə imkanlar yaradacaq”, - Səttar Möhbalıyev
qeyd edib.
AHİK sədri əlavə edib ki, ŞƏT-nin Zirvə toplantısı, burada qəbul olunacaq
Astana Bəyannaməsi, eləcə də təsdiqlənəcək qərar, bəyanat və təşəbbüslər iştirakçı
dövlətlər, o cümlədən Azərbaycan üçün faydalı olacaq, ölkələrarası əməkdaşlığı
daha da gücləndirəcək, beynəlxalq və regional problemlərin həllinə ciddi kömək
edəcək.
