Azərbaycanın əsas məqsədlərindən biri birliyi və həmrəyliyi yaratmaqdır
Azərbaycanın əsas məqsədlərindən biri birliyi və həmrəyliyi yaratmaqdır
Bakı Enerji Həftəsi, Azərbaycan Respublikasının enerji sektorunda baş verən mühüm hadisələrdən biridir. Hər il təşkil olunan bu tədbir, ölkənin enerji sahəsindəki inkişafını və gələcək perspektivlərini müzakirə etmək üçün mühüm bir platformadır.
Bakı Enerji Həftəsi, müxtəlif ölkələrdən və sənaye sahələrindən mütəxəssisləri bir araya gətirir. Bu tədbir enerji sektorunda çalışan şirkətlərin, hökumət nümayəndələrinin, investorların və akademiklərin fikir mübadiləsi etməsi üçün mükəmməl bir platformadır. Enerji sektorunun qarşısında duran problemlərin və imkanların müzakirəsi tədbirin əsas məqsədlərindən biridir. Bu növ tədbirlər enerji səmərəliliyi, dayanıqlı inkişaf və yenilənə bilən enerji mənbələri kimi mövzulara xüsusi diqqət yetirir.
04 İyun 2024-cü il tarixdə Bakı Ekspo Mərkəzində Bakı Enerji Həftəsi çərçivəsində 29-cu Beynəlxalq Xəzər Neft və Qaz - “Caspian Oil&Gas” və 12-ci Xəzər Beynəlxalq Energetika və Yaşıl Enerji - “Caspian Power” sərgilərinin rəsmi açılış mərasimi keçirildi. Azərbaycan Respublikasının Prezidenti İlham Əliyev də tədbirdə iştirak edərək geniş nitqlə çıxış etdi. 21 İyun 2024-cü il tarixdə isə “Euronews” televiziyasında sözügedən tədbirdən reportaj yayımlandı. Həmin reportajda Prezident İlham Əliyevin “Euronews”a müsahibəsi də yer aldı. Müsahibə zamanı Prezident İlham Əliyev Azərbaycanın enerji strategiyasını və bu sahədəki gələcək planlarını geniş şəkildə şərh edib.
Dövlət başçımız bildirib ki, Azərbaycan nəinki ənənəvi enerji mənbələrinə, o cümlədən bərpaolunan enerjiyə sərmayə yatıranlar üçün cəlbedici ölkədir. Həqiqətən də, Azərbaycanın həm ənənəvi enerji mənbələri, həm də bərpaolunan enerji sahəsindəki potensialı və bu sahələrə sərmayə yatırılması üçün təmin olunan sabit mühit, ölkəni investorlar üçün cəlbedici bir məkana çevirir. Ölkə, enerji sektorunda hər iki istiqamətdə də ciddi inkişaf planlarına malikdir və bu, onun beynəlxalq enerji bazarlarında önəmli bir oyunçu olaraq qalmasını təmin edir. Bu, həm enerji təhlükəsizliyi, həm də iqtisadi inkişaf baxımından əhəmiyyətlidir. Ümumilikdə qeyd edə bilərik ki, Azərbaycan, bərpaolunan enerji layihələri üçün xarici sərmayələrin cəlb olunmasına böyük əhəmiyyət verir. Ölkədə artıq bir neçə böyük günəş və külək elektrik stansiyası tikilmişdir və gələcəkdə bu say daha da genişlənəcəkdir. Xarici investorlar, Azərbaycanın bu sahədəki potensialını və dövlət tərəfindən təmin olunan sabit siyasi mühiti nəzərə alaraq, böyük maraq göstərir.
Müsahibə zamanı bu ilin ölkəmizdə “Yaşıl dünya naminə həmrəylik ili” elan edilməsini qeyd edən jurnalistə cavab olaraq dövlət başçımız bildirdi ki, COP29-a ev sahibliyi edəcək ölkə kimi bizim əsas məqsədlərimizdən biri birliyi və həmrəyliyi yaratmaqdır. Daha əvvəl də dəfələrlə bu istiqamətdə fikirlər səsləndirən Prezident İlham Əliyev müsahibələrindən birində qeyd etmişdir ki, biz bütün tərəflərin özlərini rahat hiss etdiyi bir mühit yaratmaq istəyirik. Biz qarşılıqlı səylər, həmrəylik göstərməli, bir-birimizi günahlandırmağı dayandırmalıyıq. Nefti olmayan ölkələr nefti olan ölkələri ittiham etməməlidir, kiçik və inkişaf etməkdə olan ölkələr inkişaf etmiş böyük ölkələrə “siz iqlim fəlakətinə görə məsuliyyət daşıyırsınız” deməklə onlara qarşı tələblər irəli sürməməlidirlər. Bəli, bu gün heç bir dövlət digərini günahlandırmaqla, ittiham etməklə heç nə əldə edə bilməz. Biz yalnız birlik olmalı və bütün dünyanı narahat edən bu problemin həllinə çalışmalıyıq. Şübhə yoxdur ki, Azərbaycan, iqlim dəyişikliyi məsələlərində bütün ölkələrə bərabər yanaşmanın təmin edilməsi üçün səylər göstərəcək və onların səsini beynəlxalq arenada eşitdirməyə çalışacaqdır.
Emin Süleymanov
Pirallahı rayon İcra Hakimiyyəti başçısı Aparatının
Rayon Təsərrüfatı şöbəsinin əməkdaşı
