Milli Ordumuz and yerimizdir!
Milli Ordumuz and yerimizdir!
“Ordu mövzusu, ordunun yaranması, formalaşması bizim bütün həyatımızda əsas mövzulardan biri olmalıdır, gənclərin orduda xidmət etmək üçün tərbiyələndirilməsi bizim əsas vəzifələrimizdən biri olmalıdır və bu vəzifələri biz ardıcıl surətdə həyata keçirməliyik... Xalqla ordunun birliyi həm xalqın qüdrətini, həm də ordunu daha da qüvvətli edir. Ona görə də qarşımızda duran əsas vəzifələrdən biri xalqla ordunun sağlam mənəvi birliyini təmin etməkdən ibarətdir”.
Ulu Öndər Heydər Əliyevin 1969-cu ildə hakimiyyətə gəlişindən sonra onun müstəsna xidmətləri sayəsində ölkəmizdə hərbi kadrların hazırlanması prosesi başlandı. Məhz elə buna görə də deyə bilərik ki, silahlı qüvvələrimizin inkişaf tarixi Ulu Öndər Heydər Əliyevin adı ilə bağlıdır. O, 1971-ci ildə böyük zəhmətlər bahasına Azərbaycanda hərbi kadrlar hazırlayan məktəbin – görkəmli sərkərdə Cəmşid Naxçıvanskinin adını daşıyan hərbi liseyin yaradılmasına nail oldu. Sözügedən məktəbin fəaliyyəti Azərbaycanda hərb sənətinə marağın güclənməsinə, azərbaycanlı zabit kadrların hazırlanmasına gətirib çıxarmışdı. Azərbaycan müstəqilliyini bərpa edəndən sonra C.Naxçıvanski adına Hərbi Məktəb ordu quruculuğunun əsas bazalarından birinə çevrildi. Ulu Öndər Heydər Əliyevin sayəsində azərbaycanlı gənclərin Bakı Ali Birləşmiş Komandanlıq və Bakı Ali Hərbi Dənizçilik məktəblərində oxuması, eləcə də SSRİ-nin digər hərbi məktəblərinə güzəştli şərtlərlə qəbul olunması mümkün oldu.Bu vaxta qədər isə bir azərbaycanlının nəinki hərb sahəsinə maraq salması həmçinin, o vaxtkı dövrlərin təzyiqinə görə hərbi təhsil alması olduqca əlçatmaz idi.
1994-cü il mayın 12-də Ermənistan-Azərbaycan hərbi münaqişəsində atəşkəs haqda müqavilə imzalandıqdan sonra Azərbaycan Silahlı Qüvvələrinin formalaşması daha da sürətləndi. Həyata keçirilən uğurlu siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına və döyüş ruhunun yüksəldilməsinə xüsusi diqqət ayrıldı. Ulu Öndər Heydər Əliyevin 22 may 1998-ci il tarixli Fərmanına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir. Bundan dərhal sonra Ulu Öndər Heydər Əliyev hərbi təhsil sisteminin daha da inkişaf etdirilməsi məqsədi ilə 1999-cu il fevralın 20-də Hərbi Akademiyanın yaradılması haqqında Fərman imzalamışdır.
Onun siyasi kursunun layiqli davamçısı cənab İlham Əliyev də ordu quruculuğunda mühüm addımlar atmışdır. Təkcə “44 günlük müharibə”də yüksək texnologiyaya malik “Bayrakdar” dronlarından geniş miqyaslı istifadəsi nəticəsində düşmənə ağır zərbə vurmaqla yanaşı itki sayımızı da minimuma salması bunun bariz nümunəsidir. Müharibə dövründə biz qardaş Türkiyə ilə yanaşı İsrail dövləti ilə də sıx hərbi əməkdaşlıq etdik. Ali Baş Komandan hətta müharibədən sonrakı mərhələdə də özünün və xalqın iradəsinə güvənərək addımlar atması, bəzi dairələri narahat etsə də nəticədə ölkəmizin xeyrinə işləməsinə səbəb oldu.
Mən də bir müəllim olaraq sağlam gənc nəslin yetişməsi, onların vətənpərvər olması üçün əlimdən gələni edirəm. Qarşıdan gələn 26 iyun Azərbaycan Respublikasının Silahlı Qüvvələr Günü münasibətilə başda cənab Ali Baş Komandanımız İlham Əliyev olmaqla hər kəsi təbrik edirəm. Vətənin keşiyində duran oğullarımıza can sağlığı arzulayıram. Qazilərimizə Allahdan şəfa, şəhidlərimizə rəhmət diləyirəm. Qoy həmişə sülh olsun!
Taryel Abdalov,
Xəzər rayonu, 123 nömrəli məktəbin müəllimi
Gununxeberı.az
