ATGTİ Gəncədə olan ali təhsil müəssisələrində görüşlər keçirib
ATGTİ Gəncədə olan ali təhsil müəssisələrində görüşlər keçirib. Tərkibində 101 ali və orta ixtisas təhsili müəssisəsinin Tələbə Gənclər Təşkilatını birləşdirən, Cənubi Qafqazın ən böyük tələbə təşkilatı olan Azərbaycan Tələbə Gənclər Təşkilatları İttifaqının (ATGTİ) sədri Pərviz Mirələmli, Baş katibi Rəşad Zeynalov, Mətbuat katibi Fidan Həsənova və Üzvlərlə iş üzrə menceri Aqil Quliyev Gəncəyə səfər edib. Səfər çərçivəsində Gəncə şəhərində fəaliyyət göstərən ali təhsil müəssisələrində görüşlər təşkil olunub. ATGTİ-nin nümayəndələri universitetlərdə ayrı-ayrılıqda keçirilən görüşlər zamanı, tələbə məsələləri və TGT-nin fəaliyyəti ilə bağlı yaxından maraqlanıblar. İlk görüş Gəncə Dövlət Universitetinin (GDU) Tədris məsələləri üzrə prorektoru Xurşudov Şahinlə, daha sonra Azərbaycan Texnologiya Universitetinin (ATU) rektor v.m.i.e Yaşar Ömərov, Sosial məsələlər və ictimaiyyətlə əlaqələr üzrə prorektoru Şahmar Həsənovla, sonuncu görüş isə Azərbaycan Dövlət Aqrar Universitetinin (ADAU) Tərbiyə işləri üzrə prorektoru Aida Qasımova ilə baş tutub. Görüşdə tələbələrin sosial fəaliyyətinin strategiyasında dəyişikliklər, tələbə-gənclər təşkilatları və tələbə klublarının fəaliyyətlərinin gücləndirilməsi, tələbələrlə əlaqələrin möhkəmləndirilməsi, gənclərin potensialının artırılması, beynəlxalq əməkdaşlığın və ölkə daxilindəki digər qurumlarla əməkdaşlığın genişləndirilməsi istiqamətində addımlar atılmasının vacibliyi bildirilib. Müəssisə daxilində tələbə gənclər üçün yaradılmış imkanlar, planlaşdırılan layihə və proqramlar müzakirə olunub. Sonda gənclər arasında sosial ünsiyyətin genişləndirilməsi sahəsində birgə əməkdaşlıq, müxtəlif sferaları əhatə edən ortaq layihələrin həyata keçirilməsi, sosial sahibkarlığın tələbələr arasında təşviq olunması üzrə danışıqlar aparılıb.
Gununxeberı.az
