İranda prezidentliyə namizədlərin teledebatları başlayıb
İranda prezidentliyə namizədlər arasında ilk teledebat keçirilib.
Gununxeberi.az İran KİV-nə istinadən xəbər verir ki, dövlət televiziyasında yayımlanan ilk debat proqramında iqtisadi məsələlərlə yanaşı, qadın və ailəyə münasibət də yer alıb. Altı namizədin hamısı qadınlar və ailəyə dair fikirlərini təqdim ediblər.
Teledebat zamanı namizədlərin bir-birinə söz atması halları da yaşanıb.
Prezidentliyə namizədlər bu axşam canlı yayımda ikinci dəfə üz-üzə gələcəklər. Namizədlərin ikinci debatı “Hakimiyyətin ədalət yönümlü xidməti” adı altında keçiriləcək.
Cümə günü, iyunun 21-də keçiriləcək üçüncü debatın mövzusu “mədəni idarəçiliklə sosial harmoniya” olacaq.
Namizədlər bazar ertəsi, iyunun 24-də “İran bugünkü dünyada” başlığı ilə canlı yayımda siyasi məsələləri müzakirə edəcəklər.
Prezidentliyə namizədlər iyunun 25-ində iqtisadi məsələləri müzakirə edəcəklər.
İranın Konstitusiya Keşikçiləri Şurası (12 üzvü var) iyunun 28-də keçiriləcək prezident seçkilərində 6 namizədin iştirakına icazə verib:
Mustafa Purməhəmmədi - prokuror və keçmiş ədliyyə naziri;
Məsud Pezeşkian - parlamentin deputatı, keçmiş səhiyyə naziri;
Əlirza Zakani - Tehran meri;
Səid Cəlili - İran ali rəhbərinin Təhlükəsizlik Şurasındakı nümayəndəsi;
Məhəmməd Baqir Qalibaf - parlamentin hazırkı sədri;
Seyid Əmir Hüseyin Qazizadə Haşimi - parlament sədrinin keçmiş müavini.
İranda növbədənkənar prezident seçkiləri iyunun 28-nə planlaşdırılıb.
Namizədlərdən heç biri lazımi miqdarda səs yığa bilməsə, iyulun 5-də ən çox səs toplayan iki namizədin iştirakı ilə seçkilərin ikinci turu keçiriləcək.
İran qanunvericiliyinə əsasən, prezident birbaşa ümumi səsvermə yolu ilə dörd il müddətinə seçilir. Eyni şəxs ardıcıl iki müddətdən çox dövlət başçısı seçilə bilməz. Prezident postuna namizəd olmaq istəyən şəxs 40-75 yaşlarında, dövlət qurumlarında rəhbər vəzifələrdə iş təcrübəsinə malik İran vətəndaşı olmalıdır.
Mayın 19-da İranın şimalındakı Şərqi Azərbaycan əyalətində göyərtəsində ölkə prezidenti İbrahim Rəisinin və xarici işlər naziri Hüseyn Əmir Abdullahianın olduğu helikopter qəzaya uğrayıb. Helikopterdə olan 9 nəfərin hamısı həlak olub. Bu səbəbdən də növbədənkənar prezident seçkiləri gündəmə gəlib.