Gələcək münasibətlərin məzmunu
Gələcək münasibətlərin məzmunu
15 may 2021-ci ildə Azərbaycan və Türkiyə liderlərinin imzaladıqları Şuşa Bəyannaməsi iki ölkə arasında hərbi, iqtisadi, mədəni, siyasi, demək olar ki, bütün sahələrdə əməkdaşlığı daha da gücləndirməyi hədəfləyir. Şuşa Bəyannaməsi Azərbaycan və Türkiyə arasında müttəfiqlik münasibətlərini hüquqi çərçivəyə salmaqla yanaşı, regional sülh və sabitlik üçün də əhəmiyyətli bir addımdır desək, yanılmarıq.
Bu bəyannamə ilə iki ölkə arasındakı strateji əlaqələr daha da möhkəmləndi və bölgədəki güc balansında mühüm rol oynamağa başladı. Şuşa Bəyannaməsi ilə Azərbaycan və Türkiyə arasındakı münasibətlər, tarixi və mədəni bağlar daha da dərinləşdi. Şuşa şəhərinin seçilməsi Azərbaycanın mədəniyyət paytaxtı və Qarabağın incisi olaraq bu sənədin əhəmiyyətini daha da artırdı. Bəyannamə, hər iki ölkənin regional və beynəlxalq səviyyədə birgə hərəkət etmə əzmini göstərir və Azərbaycan-Türkiyə münasibətlərinin gələcəkdə də güclənəcəyinə dair əminliyi ifadə edir.
Türk dünyası üçün Şuşa Bəyannaməsi məzmunu və bu sahədəki təcrübələri baxımından mühüm motivasiya və ilham mənbəyidir. Bu baxımdan, Türkiyə-Azərbaycan münasibətlərində Şuşa Bəyannaməsinə uyğun irəliləyiş gələcək dövrdə Türk Dövlətləri Təşkilatı çərçivəsində və üzv ölkələr arasında əməkdaşlıq üçün presedent yaratmaq potensialına malikdir.
Nicat Quliyev,
Yeni Azərbaycan Partiyası Laçın rayon təşkilatının məsləhətçisi
