Respublika Gənclər Kitabxanası 15 İyun Milli Qurtuluş Günü ilə əlaqədar silsilə tədbirlərini davam etdirir
Azərbaycan xalqının taleyində böyük əhəmiyyəti olan günlərdən biri və ən önəmlisi tariximizə qızıl hərflərlə yazılmış 15 İyun – Milli Qurtuluş Günüdür. Azərbaycanın dövlətçilik tarixinin şanlı səhifəsi - Milli Qurtuluş Günü Ümummilli Lider Heydər Əliyevin adı ilə bağlıdır. Heydər Əliyev öz xilaskarlıq missiyası ilə ölkəmizin müstəqilliyini qorumuş, respublikada tüğyan edən ictimai-siyasi böhranı aradan qaldırmış və bütün sahələrdə inkişafın təməlini qoymuşdur.
Cəfər Cabbarlı adına Respublika Gənclər Kitabxanasında 15 İyun Milli Qurtuluş Günü ilə əlaqədar “Milli oyanış, milli ruhun canlanması” adlı videomaterial və ənənəvi kitab sərgisi hazırlanıb.
Kitabxananın əməkdaşları tərəfindən hazırlanan videomaterialda bu tarixin bütün hadisələri ardıcıllıqla əks etdirilir. Videoçarxlarda tarixin o günlərinin abu havası, xalq içərisində yaşanan gərginlik, xalqın Heydər Əliyevin ətrafında bir yumruq kimi birləşməsi geniş formada, tarixi faktlar və görüntülərlə işıqlandırılır. Hazırlanan materialda Ulu Öndər Heydər Əliyevin əzmkar mübarizəsi, müdrik siyasəti sayəsində 15 İyun tarixinin təkcə dövlətçiliyimizin xilası deyil, həmçinin, bu tarixin Azərbaycanın bu gününü, sabahını müəyyənləşdirən bir uğurlu siyasətin göstəricisi olması bildirilir. Video materiallarda “Ulu Öndər xatirələrdə” bölməsində millət vəkillərinin, ölkənin ictimai-siyasi xadimlərinin Heydər Əliyev haqqında söylədikləri dəyərli fikirlər, tarixi faktlar, Ulu Öndərin nitqlərindən video görüntülər də yer alır.
“15 İyun Milli Qurtuluş Günü” adlı ənənəvi kitab sərgisində isə Milli Qurtuluş Gününün tarixini, Ümummilli Lider Heydər Əliyevin siyasi faəliyyətini əks etdirən kitablar, dövrü mətbuat materialları, kitabxana əməkdaşları tərəfindən hazırlanmış vəsaitlər sərgilənməkdədir.
“Milli oyanış, milli ruhun canlanması” adlı videomaterial kitabxananın rəsmi saytında https://ryl.az/multimedia/milli-oyanis-milli-ruhun-canlanmasi yerləşdirilmişdir.