Azərbaycan Milli Xalça Muzeyində “Müxtəlifliyin gözəlliyi” adlı sərgi açılıb
İyunun 13-də ölkəmizdə ilk dəfə Azərbaycan Milli Xalça Muzeyində Monteneqro
xalqının ənənəvi mədəniyyətini təcəssüm etdirən “Müxtəlifliyin gözəlliyi” adlı
sərginin açılış mərasimi keçirilib.
Tədbirdə çıxış edən Azərbaycan Milli Xalça Muzeyinin direktoru Əminə Məlikova
bildirib ki, sərgidə Monteneqronun zəngin milli-mədəni irsə malik olduğunu
göstərən XIX–XX əsrlərə aid 170-dən çox eksponat yer alır. O, Monteneqro Milli
Muzeyinin kolleksiyasından olan geyimlərin Qədim Balkan, Roma, Bizans, yunan,
slavyan, hətta türk və islam irsinin özəlliklərini əks etdirdiyini diqqətə çatdırıb.
Tamaşaçıların burada şəhərli və kəndli, zadəgan və sadə insanların, həmçinin
gündəlik və bayram geyimləri ilə əyani tanış olacaqlarını vurğulayıb. Qeyd edib ki,
mədəni, etnik və dini müxtəliflik, bu müxtəlifliyin qorunub saxlanılması və inkişaf
etdirilməsi Monteneqro ənənəvi mədəniyyətini unudulmaz edir.
Nizami Gəncəvi adına Milli Azərbaycan Ədəbiyyatı Muzeyinin direktoru, millət
vəkili, akademik Rəfael Hüseynov iki ölkə arasında siyasi və mədəni əlaqələrin,
həmçinin dostluq münasibətlərinin daim inkişaf etdiyini deyib. “Müxtəlifliyin
gözəlliyi” sərgisinin qarşılıqlı əməkdaşlığın, mədəniyyət bağlarının
möhkəmlənməsinə töhfə olduğunu bildirib.
Monteneqro Milli Muzeyinin direktoru Yakşa Çalasan Monteneqro mədəni irsinin
bir hisəsini Azərbaycan xalqına nümayiş etdirməkdən böyük məmnunluq
duyduqlarını söyləyib.
Monteneqro Tarix Muzeyinin direktoru Filip Kuzman isə çıxışında diqqətə çatdırıb
ki, ölkəsinin ərazisi çox kiçik olsa da, zəngin və bənzərsiz mədəni irsə, unikal milli
geyimlərə sahibdir. O, mədəniyyət və ənənənin bütün xalqları, ölkələri birləşdirən,
fərqli dünyanı daha yaxşı anlamağa imkan verən vasitə olduğunu deyib.
Mədəniyyətlərarası əməkdaşlığı inkişaf etdirməyin, ümumi mədəni və tarixi irsin,
dəyərlərin təbliğinin vacibliyini vurğulayıb.
Sonra qonaqlar sərgiyə tamaşa ediblər.
Azərbaycan Respublikası Mədəniyyət Nazirliyinin, Monteneqro Mədəniyyət və
Media Nazirliyinin dəstəyi, Azərbaycan Milli Xalça Muzeyi və Monteneqro Milli
Muzeyinin təşkilatçılığı ilə baş tutan sərgi avqustun 31-dək davam edəcək.
