Milli Məclisdə görüş
İyunun 13-də Milli Məclisin Beynəlxalq münasibətlər və parlamentlərarası əlaqələr
komitəsinin sədri Səməd Seyidov, sədr müavini Sevinc Fətəliyeva və komitənin üzvü Asim
Mollazadə ADA Universitetinin “Xarici Siyasət Proqramı”nda iştirak edən bir qrup gənc
diplomatla görüşüblər.
ADA Universitetinin təmsilçisi Aygün Hacıyeva görüşdə “Xarici Siyasət Proqramı”
barədə qısa məlumat verib. Bildirilib ki, 2018-ci ildən bu günədək 70-ə yaxın ölkədən olan 116
diplomat bu proqramda uğurla iştirak edib.
Qonaqları səmimi salamlayan Səməd Seyidov, Azərbaycan parlamentinin strukturu,
fəaliyyəti, beynəlxalq əlaqələri barədə ətraflı məlumat verib. Parlamentin beynəlxalq
diplomatiya sahəsindəki uğurlu fəaliyyəti haqqında danışılıb, qanunverici orqanımızda 103
ölkə ilə parlamentlərarası əlaqələr üzrə işçi qruplarının fəaliyyət göstərdiyi bildirilib. Milli
Məclisin 17 beynəlxalq parlament təşkilatı ilə uğurlu əməkdaşlığından söhbət açan komitə
sədri diqqətə çatdırıb ki, hazırda parlament TÜRKPA, Qoşulmama Hərəkatının Parlament
Şəbəkəsi və Asiya Parlament Assambleyası da daxil olmaqla üç beynəlxalq parlament
qurumuna sədrliyi həyata keçirir.
Regionda yaranmış yeni reallıqlardan söz açan Səməd Seyidov, Azərbaycan
Respublikasının Prezidenti cənab İlham Əliyevin cari ilin 14 fevral tarixində keçirilən andiçmə
mərasimində ölkəmizin xarici siyasət kursu ilə bağlı söylədiyi nitqindəki strateji seçiminə
diqqəti çəkib. Komitə sədri deyib ki, ölkə başçısının çıxışı zamanı səsləndirdiyi “Bizim başqa
ailəmiz yoxdur, bizim ailəmiz Türk dünyasıdır” fikri ölkəmiz üçün strateji məqsəd və vəzifələri
müəyyən edir.
Azərbaycanın tarixi, mədəniyyəti, multikultural dəyərləri barədə danışan komitə
sədrinin müavini Sevinc Fətəliyeva və deputat Asim Mollazadə ölkəmizin yürütdüyü daxili və
xarici siyasətin prioritetləri haqqında fikirlər səsləndiriblər, parlamentə seçkilərin keçirilməsi
qaydaları, siyasi partiyaların və qadınların parlamentdə təmsilçiliyi, həmçinin onların
cəmiyyətdəki rolu haqqında qonaqlara məlumat veriblər. Deputatlar gənc diplomatlarla
keçirilən belə görüşlərin əhəmiyyətini qeyd ediblər.
Söhbət zamanı Ermənistanla ikitərəfli əsasda davam edən sülh danışıqları,
Azərbaycanın neokolonializmə qarşı nümayiş etdirdiyi barışmaz mövqeyi, ölkəmizin bu ilin
noyabr ayında Bakıda BMT-nin İqlim Dəyişikliyi üzrə Çərçivə Konvensiyasının Tərəflər
Konfransının 29-cu sessiyasına ev sahibi seçilməsi barədə də tədbir iştirakçılarına məlumat
verilib.
Görüş diplomatları maraqlandıran mövzuların müzakirəsi ilə davam edib, onların
sualları cavablandırılıb.
Milli Məclisin Mətbuat və
ictimaiyyətlə əlaqələr şöbəsi
