Milli Kitabxanada "Hüseyn Kürdoğlu – 90" adlı kitab sərgisi açılıb
Milli Kitabxanada "Hüseyn Kürdoğlu – 90" adlı kitab sərgisi açılıb
Ötən əsrin 50-ci illərində ədəbiyyata gəlmiş istedadlı şair Hüseyn Kürdoğlu 1934-cü il iyunun 15-də Laçın rayonunun Əhmədli (Mollaməhmədi) kəndində kolxozçu ailəsində doğulub.
Hüseyn Kürdoğlu ədəbi yaradıcılığa erkən başlayıb, ilk şeirləri hələ orta məktəbin beşinci sinfində ikən Laçın rayonunda çıxan "Sovet Kürdüstanı" qəzetində çap edilib. Onun "Gözəldir" rədifli ilk qoşması 1950-ci ildə "Azərbaycan gəncləri" qəzetində dərc olunandan sonra dövri mətbuatda müntəzəm çıxış etməyə başlayıb. Hüseyn Kürdoğlu eyni zamanda tərcüməçi kimi də özünü sınayıb.
Azərbaycan ədəbiyyatında özünəməxsus şair kimi qəbul olunan, gözəl təbiət şeirlərinin müəllifi Hüseyn Kürdoğlunun ilham mənbəyi təbiətdir. Şair təbiətin gözəlliyini tərənnüm edən çox sayda şeirlər yazıb.
"Səhər nəğmələri", "Yurdumu gəzə-gəzə", "Qaya çiçəkləri", "Durna səsi", "Çiçək təbəssümü", "Quzular dağa çıxdı", "Yaralı torpağım, yaralı sevgim" və s. kitabları çap olunub. Hüseyn Kürdoğlunun 1992-ci ildə “Gənclik” nəşriyyatında çap etdirdiyi “Min bir bayatı” kitabı Azərbaycan yazılı şeirində bayatılardan ibarət ilk müəllif kitabı kimi mühüm əhəmiyyət kəsb edir.
Hüseyn Kürdoğlu Azərbaycan ədəbiyyatı tarixində öz dəsti-xətti ilə seçilən şəxsiyyətlərdən biri olub. Uzun müddət, ömrünün sonunadək Azərbaycan Elmlər Akademiyasının Nizami adına Ədəbiyyat İnstitutunda çalışıb.
Gununeberi.az xəbər verir ki,Milli Kitabxanada şairin 90 illik yubileyi münasibətilə “Hüseyn Kürdoğlu – 90” adlı kitab sərgisi açılıb. Sərgidə şairin əsərləri, tərcümə etdiyi, redaktor və ön sözün müəllifi olduğu, həyatı və yaradıcılığı haqqında kitablar nümayış olunur.
Sərgi 1 həftə davam edəcək.
