Türk dünyası bir ailədir....
Türk dünyası bir ailədir....
Çoxəsrlik ortaq tarixi və mədəni köklərə malik olan Türk dünyası xalqlarının birliyi və vəhdəti daim Azərbaycan dövlətinin maraq dairəsində olmuş, xarici siyasətimizin əsas prioritetlərindən biri kimi daim diqqət mərkəzində saxlanılmışdır. Bu istiqamətdə aparılan uğurlu siyasətin nəticəsini 44 günlük Vətən müharibəsində hər birimiz əyani şəkildə gördük. Qardaş Türkiyə dövlətinin siyasi, maddi-mənəvi dəstəyi, həmçinin media sahəsində əməkdaşlığımız, regionda baş verən hadisələrin obyektiv şəkildə dünya ictimaiyyətinə çatdırılması və s. məhz bu qardaşlıq və birliyin təzahürüdür.
Yaxın zamanlarda açılması gözlənilən Orta Dəhlizin açılması uzun illər bir-birindən iraq düşmüş Türk ulusunu nəinki iqtisadi, həmçinin siyasi, mədəni və mədəni baxımdan daha da yaxınlaşdıracaqdır. Dövlətimiz bu məsələdə də əlaqələndirici olaraq yaxından iştirak edir. Müzəffər Ali Baş Komandan İlham Əliyevin söylədiyi kimi, türk xalqları bir ailədir və bizim başqa bir ailəmiz yoxdur. Dövlətimizin başçısı daim öz çıxışlarında türk dünyasındakı birlik və həmrəyliyin dünyada sülh və əmin-amanlığına, sabitliyə, enerji təminatı, ərzaq təhlükəsizliyi məsələlərinə və Türkiyədən Qafqaza, Orta Asiyadan Çin sərhədinə kimi digər sahələrdə də strateji maraqlara xidmət edəcəyini vurğulayıb.
Başqa bir qürurverici hadisə yaxın günlərdə keçirilməsi nəzərdə tutulan Türk Dövlətləri Təşkilatının qeyri-rəsmi Zirvə görüşünün Azərbaycanın mədəniyyət beşiyi olan qədim Şuşa şəhərində keçirilməsidir. Bu görüşün keçirilməsi hürriyyətinə qovuşmuş əzəli və əbədi torpaqlarımızın Türk dünyasının nəqliyyat əlaqələrinin təmin olunmasına, həmçinin Qarabağın yenidən dirçəldirilməsi və yenidən bərpasına öz töhfələrini verəcəkdir. Artıq Mərkəzi Asiyada yerləşən qardaş ölkələr- Özbəkistan və Qazaxıstanın maliyyə dəstəyi ilə məktəblər və bir sıra mədəniyyət ocaqları inşa olunmuşdur. Türkiyə Qazaxıstan, Özbəkistan və Qırğızıstanın prezidentlərinin işğaldan azad olunmuş ərazilərə səfəri ölkələrimiz arasında daha da yaxınlaşmanı və əməkdaşlığı təmin edəcəkdir. Əminəm ki, xalqlarımız arasındakı dostluq və əməkdaşlıq daim yüksələn xətt üzrə inkişaf edəcəkdir.
Amil Məmmədov,
Xəzər rayonu, 117 nömrəli tam orta məktəbin müəllimi