Bizim ailəmiz Türk dünyasıdır

06 iyun 2024-cü il tarixdə Prezident İlham Əliyev TÜRKPA-nın növbəti plenar

iclasının iştirakçılarını qəbul etdi. Türkiyə, Qazaxıstan, Qırğızıstan, Özbəkistan, Şimali

Kipr Türk Cümhuriyyəti və Macarıstan Respublikalarından olan nümayəndələrin iştirak

etdiyi görüş səmimi abu havada və yüksək əhval-ruhiyyədə baş tutdu. Qəbul zamanı

TürkPA-nın fəaliyyəti, üzv ölkələr arasında əməkdaşlığın daha da gücləndirilməsi və

gələcək planlar barədə müzakirələr aparıldı. Dövlət başçımız görüşdəki nitqi zamanı Türk

dövlətləri ilə əlaqələrin Azərbaycan üçün prioritet istiqamət olduğunu qeyd etdi. Cari ildə

ölkəmizdə baş tutan növbədənkənar Prezident seçkilərində inamlı qələbə qazanan

Prezident İlham Əliyev 14 fevral 2024-cü il tarixdə baş tutan andiçmə mərasimində də

bənzər fikirlərlə çıxış edərək qeyd etmişdi ki, “Bizim ailəmiz Türk dünyasıdır.... Türk

Dövlətləri Təşkilatına üzv olan bütün ölkələrlə qardaşlıq münasibətlərimiz var və bizim

siyasətimiz Türk Dövlətləri Təşkilatını gücləndirməkdir. Bu, böyük coğrafiyadır, böyük

ərazidir, böyük hərbi gücdür, böyük iqtisadiyyatdır, təbii sərvətlərdir, nəqliyyat

yollarıdır, gənc əhalidir, artan əhalidir və bir soydan, kökdən olan xalqlardır”.

Məlumat üçün qeyd edək ki, TÜRKPA, Türk dilini danışan ölkələr arasında

parlament səviyyəsində əməkdaşlığı gücləndirmək və birgə fəaliyyətləri təşviq etmək

məqsədi daşıyan bir təşkilatdır. Təşkilatın fəaliyyət istiqamətləri çoxşaxəlidir və siyasi,

iqtisadi, mədəni və sosial sahələrdə geniş miqyaslı fəaliyyətləri əhatə edir. TÜRKPA-nın

görüşləri ildə bir dəfə keçirilir. Bu toplantılar, TürkPA-nın ən yüksək qərarverici orqanı

olan Baş Assambleyanın üzvlərini bir araya gətirir. Üzv ölkələrin parlament

nümayəndələri toplantılarda bir araya gələrək, təşkilatın fəaliyyətlərini müzakirə edir,

ortaq qərarlar alır və gələcək üçün planlar hazırlayır. Dövlət başçımız görüşdəki nitqi

zamanı hazırkı geosiyasi şəraitdə TÜRKPA-nın ildə bir dəfə görüşünün kifayət

etmədiyini, sürətli və davamlı təmaslara ehtiyac olduğunu bildirdi. Həqiqətən də,

təşkilatın fəaliyyətini daha da səmərəli hala gətirmək üçün il ərzində daha çox görüşmək,

daha çox müzakirələr aparmaq və həll yolları axtarmaq zərurəti mövcuddur. Üzv ölkələr

arasında əlaqələri möhkəmləndirmək və qarşılıqlı fayda əldə etmək məqsədilə daha çevik

və intensiv əlaqə qurulması vacibdir.

Prezident İlham Əliyev görüş zamanı, TürkPA-nın iqlim məsələlərində

fəaliyyətlərini genişləndirməsinin vacibliyini də qeyd etdi. Ümumilikdə, Prezident İlham

Əliyevin TÜRKPA-nın növbəti plenar iclasının iştirakçılarını qəbul etməsi, Türk dili

danışan ölkələr arasında əlaqələrin daha da gücləndirilməsi və əməkdaşlığın inkişaf

etdirilməsi, TürkPA-nın üzv ölkələri arasında daha sıx və qarşılıqlı dəstək üçün möhkəm

bir platforma yaradılması yolunda əhəmiyyətli bir addım olmuşdur. Şübhə yoxdur ki,

Azərbaycan bundan sonra da, TürkPA-nın inkişafına dəstəyini davam etdirərək, türk

dünyasının ortaq maraqlarının və dəyərlərinin təşviqində mühüm rol oynamağa davam

edəcəkdir.

Sailə Salahova

YAP Pirallahı rayon təşkilatının fəalı