İqlim dəyişikliyi hər bir ölkə üçün çağırışdır
İqlim dəyişikliyi hər bir ölkə üçün çağırışdır
Prezident İlham Əliyev 4 iyul 2024-cü il tarixdə Bakı Enerji Həftəsi çərçivəsində 29-cu “Caspian Oil&Gas” və 12-ci “Caspian Power” sərgilərinin rəsmi açılış mərasimində iştirak etdi. Tədbir çərçivəsində geniş nitqlə çıxış edən Azərbaycan Prezidenti Azərbaycanın bu sektorda qət etdiyi yol, əldə etdiyi nailiyyətlərlə yanaşı, həm də gələcək inkişaf üçün yol xəritəsini, əməkdaşlıq üçün isə, fürsət imkanlarını aydın şəkildə göstərdi. Dövlətimizin başçısı bu günə kimi keçirilən keşməkeşli yol barədə də geniş məlumat verdi. Bu isə təsadüf deyildi. Təbii ehtiyatların verdiyi dividend qədər, onların mövcudluğuna görə ölkəyə və dövlətə gətirdiyi çətinlikləri də dəf etmək asan deyil. Bu, olduqca ehtiyatlı siyasət tələb edirdi ki, bunu da məharətli diplomatiya yürüdərək ölkəyə birbaşa xarici investisiya cəlb etməklə Ümummilli Liderimiz Heydər Əliyev 1994-cü il sentyabrın 20-də “Əsrin müqaviləsi” kimi böyük bir layihəni reallaşdırmaqla bacardı. Üstəlik, həmin dövrdə ölkəmizin içində olduğu şərait kifayət qədər çətin idi. Buna baxmayaraq investorlar Heydər Əliyev siyasətinə, hökumətə və xalqımıza etibar etdi və nəticədə nəhəng neft hasilatı layihəsi icra olundu. Bu layihə neft sahəsində və ölkəmizin gələcəyində böyük əhəmiyyət kəsb etdi. Bu gün artıq Azərbaycan özünü böyük layihələrin icraçısı, etibarlı tərəfdaş, sözü də imzası qədər dəyərli partnyor olaraq təsdiq edib. Əsas güc mərkəzləri, böyük dövlətlər və beynəlxalq təşkilatlar ilə qurduğumuz uğurlu əməkdaşlıq, eləcə də qonşu ölkələrlə əlaqələrimizin inkişafı hazırda dünyanın bir çox yerlərində münaqişə, gərginlik və böhranların hökm sürdüyü bir dövrdə Azərbaycan üçün çox vacib müsbət beynəlxalq imic yaradıb. Bunun nəticəsidir ki, COP29 kimi mötəbər və genişmiqyaslı tədbir bu il ölkəmizdə keçiriləcəkdir. Prezident İlham Əliyevin tədbirdə dediyi kimi, COP29-a ev sahibliyi etmək kimi məsuliyyətli vəzifəni üzərimizə götürməyin üstünlükləri olduğu kimi, müəyyən çətinlikləri də vardır. Amma Azərbaycan vədlərinə sadiqdir. Ölkəmiz qlobal problemlərdən biri olan iqlim dəyişmələrinə qarşı səyləri səfərbər etmək və bu mübarizəyə töhfə verməklə dünyanın xüsusi diqqət mərkəzində olacaqdır. Bu, şübhəsizdir.
Ölkə başçımız nitqində Azərbaycanda da iqlim dəyişikliyinin müşahidə olunduğunu- Xəzər dənizinin suyunun ildən-ilə çəkildiyini ifadə etdi. Bunun səbəbi isə ölkəmizdə yox, ölkəmizin hüdudlarından kənarda baş verən qeyri-rasional siyasətdir. Məlumdur ki, Xəzəri bəsləyən əsas mənbələr xaricdədir. Əgər yaxın zamanda ciddi tədbirlər görülməzsə, biz böyük bir fəlakətlə üzləşəcəyik. Biz dənizi əlavə su həcmləri ilə təmin etmək üçün yeni bəndlər və su toplanması üçün anbarlar inşa edirik. Lakin Xəzər dənizini qidalandıran əsas mənbələr Azərbaycanda deyil.
Sonda qeyd edək ki, regionun enerji sahəsində mühüm hadisə olan Bakı Enerji Həftəsi iyunun 6-dək davam edəcək. “Caspian Oil&Gas” və “Caspian Power” sərgilərini özündə birləşdirən Bakı Enerji Həftəsi bütün dünyanın enerji sənayesi sahəsində mövcud olan liderlərini bir araya gətirir və bununla da diqqəti Azərbaycana cəmləşdirir. Azərbaycan Respublikasının Prezidenti İlham Əliyevin Bakı Enerji Həftəsinin açılış mərasimində iştirakı bu tədbirin yüksək statusunu təsdiqləyir. Bakı Enerji Həftəsi çərçivəsində təşkil ediləcək daha bir mötəbər tədbir isə Bakı Enerji Forumudur. Forumda həm Azərbaycan, həm də Xəzər regionu üçün vacib olan enerji məsələləri gündəmdə olacaq. Foruma 600-dən çox nümayəndənin qatılacağı gözlənilir. COP29 ərəfəsində Bakı Enerji Forumunun proqramına “Yaşıl dünya naminə. COP29 strateji inkişaf yolları” adlı xüsusi sessiya da əlavə edilib. Sessiyada məruzəçi qismində iştirak etmək üçün digər ölkələrdən xüsusi qonaqlar dəvət olunub.
Səkinə Rüstəmzadə
“Pirallahı Tibb Mərkəzi” PHŞ-nin əməkdaşı
