Xəzər rayonunda 2023-2024-cü tədris ilində ali təhsil ocaqlarına qəbul imtahanlarında yüksək nəticə əldə edərək 600-dən yuxarı bal toplayan tələbələrlə görüş keçirilib.

Gununxeberi.az xəbər verir ki, bu gün Mərdəkan Mədəniyyət Mərkəzində keçirilən görüşdə Xəzər Rayon İcra Hakimiyyətinin başçısı Elşən Salahov, Bakı Şəhəri üzrə Təhsil İdarəsinin müdir müavini Hüseyn Əsgərov, YAP Xəzər rayon təşkilatının sədri Namiq Əhmədov, RİH başçısının müavinlər, RİH başçısı Aparatının şöbə müdirləri, Təhsil İşçiləri Azad Həmkarlar İttifaqının Xəzər Rayon Komitəsinin sədri Həzərxan Əbilov, Vətən Müharibəsi Qəhrəmanı şəhid Elçin Mansurovun anası Məleykə Məcidova, təhsil müəssisələrinin nümayəndələri, tələbə adını qazanmış gənclər və onların valideynləri iştirak ediblər.

Görüş Dövlət Himninin səsləndirilməsi və ölkəmizin ərazi bütövlüyü naminə canından keçən şəhidlərimizin əziz xatirələrinin bir dəqiqəlik sükutla yad edilməsi ilə başlayıb.

Xəzər Rayon İcra Hakimiyətinin başçısı Elşən Salahov ali təhsil ocaqlarına qəbul imtahanlarından uğurla keçərək tələbə adını qazanan bütün məzunları, onların valideynlərini və müəllimlərini təbrik edərək, ümummilli lider Heydər Əliyevin ötən əsrin 70-ci illərində əsasını qoyduğu təhsil strategiyasının ölkəmizdə milli köklərə bağlı, yeni təfəkkürlü və təhsilli gənc kadrların yetişdirilməsinə hesablandığını və təhsilin millətin taleyi üçün misilsiz əhəmiyyət daşıdığını hər zaman vurğulayan ulu öndər Heydər Əliyevin bu sahəyə çox böyük diqqət və qayğı göstərdiyini qeyd etdi. 

Elşən Salahov bildirib ki, ümummilli liderin siyasətini uğurla davam etdirən Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyeva tərəfindən ölkəmizdə təhsilə olan diqqət və qayğı göz qabağındadır. Tədris müəssisələrinin maddi-texniki bazası möhkəmləndirilir, yeni məktəb binaları inşa edilir, mövcud məktəb binaları təmir olunur və ya yenidən qurulur. Tədris prosesidə ən qabaqcıl texnologiyaların imkanlarından istifadə edilir. Yaradılan şərait artıq öz bəhrəsini göstərməkdədir.

Məhz bu diqqət və qayğının nəticəsidir ki, Xəzər rayonunda tələbə adını qazanan abituriyentlərdən 68-i 600-dən yuxarı bal toplayaraq ali təhsil ocaqlarına daxil olublar. 

Həmçinin E.Salahov onların arasında təhsilini Qarabağ Universitetində davam etdirəcək bir tələbəmizin olmasının sevindirici hal olduğunu vurğulayıb.

Sonra Bakı Şəhəri üzrə Təhsil İdarəsinin müdir müavini Hüseyn Əsgərov, YAP Xəzər rayon təşkilatının sədri Namiq Əhmədov, Vətən Müharibəsi Qəhrəmanı şəhid Elçin Mansurovun anası Məleykə Məcidova və 149 №li tam orta məktəbin direktoru Rəhilə Baxşıyeva çıxış edərək, bu gün ölkəmizdə davamlı inkişaf və sabitliklə yanaşı, həm də sağlam mənəvi mühitin formalaşdığını, məktəblilərin milli ruhda yetişdiklərini qeyd ediblər və bu nailiyyətlərin dövlətin təhsilə olan diqqət və qayğısının bariz nümunəsi olduğunu vurğulayıblar.

Çıxış edən natiqlər tələbə adını qazanan gənclərə yeni yeni nailiyyətlər arzulayıblar. Görüşdə həmçinin qəbul imtahanında 675 bal toplayan 124 nömrəli məktəbin məzunu Zeyqəm Hüseynli və 674 bal toplayan 117 nömrəli məktəbin məzunu Aydan Xanəhmədli çıxış edərək, onlara yaradılan şəraitə, göstərilən diqqət və qayğıya görə ölkə başçısı cənab İlham Əliyevə və Birinci vitse-prezident Mehriban xanım Əliyevaya gənclər adından öz təşəkkürlərini bildiriblər.

Tədbirdə 2023-2024-cü tədris ilində ali təhsil ocaqlarına qəbul imtahanlarında yüksək nəticə əldə edərək 600-dən yuxarı bal toplayan tələbələr Xəzər Rayon İcra Hakimiyyəti tərəfində Diplomlarla təltif olunaraq onlara hədiyyələr təqdim edilib. Sonda xatirə şəkli çəkilib.

Gununxeberı.az