Azərbaycan parlament seçkilərində səsvermə prosesi sabit keçib - Albaniya nümayəndəsi
Azərbaycanda parlament seçkiləri zamanı səsvermə prosesi sabit keçib.
Gununxeberi.az xəbər verir ki, bu barədə Albaniya parlamentinin nümayəndəsi Petro Koçi mətbuat konfransında jurnalistlərə bildirib.
"Biz Azərbaycanda seçkiləri müşahidə etdik. İnsanlar gəldi və namizədlərə səs verdilər. Bu seçkilər ölkənin siyasətində xüsusi rol oynadı", - o vurğulayıb.
O, həmçinin, səsvermə prosesi zamanı heç bir qanun pozuntusunun baş vermədiyini və seçkilərin beynəlxalq hüquqa uyğun keçirildiyini əlavə edib.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.
Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.
