Partiyalar parlament seçkilərinə niyə blokla getmədilər? - Səbəblər AÇIQLANDI
Parlament seçkilərinə artıq bir gün qalıb. Seçkilərdə 26 siyasi partiyadan 25-i yarışır. Lakin bu təşkilatlardan yalnız hakim Yeni Azərbaycan Partiyası (YAP) bütün seçki dairələrindən namizəd irəli sürüb. Digər partiyaların irəli sürdükləri namizədlərin ümumi sayı YAP-ın namizəd sayından aşağıdır.
Maraqlıdır, siyasi partiyalar blok şəklində seçkilərə qatıla bilərdimi?
Gununxeberi.az bu məsələ ilə bağlı siyasi partiyalar arasında sorğu keçirib.
Böyük Quruluş Partiyasının 26 saylı Sabunçu birinci seçki dairəsindən namizədi Fazil Mustafa blok halında seçkilərdə iştirak etməmələrinin səbəbini belə izah edib:
"Partiya olsaq da, seçkidə bir nəfərlə iştirak edirik. Açığı digər namizədlərin hansısa dairədən seçilməsi real deyildi. Ona görə də belə qərar verildi ki, seçkilərdə təklikdə iştirak edək və partiyanın bütün resurslarını da bir dairəyə yönəldək. Əsas məsələ parlamentdə təmsil olunmaqdır”.
Böyük Azərbaycan Partiyasının sədri, 10 saylı Binəqədi üçüncü seçki dairəsindən namizəd Elşad Musayev isə vurğulayıb ki, blok halında seçkilərə getmək üçün şərait yoxdur:
"Blok halında seçkiyə getmək vacib şərt deyil. Siyasi partiyaların seçkilərə blok halında getməsi üçün tarixi şərait olur. Siyasi partiyaların ideoloji yönümləri eyni olmalıdır. Azərbaycanda elə siyasi partiya rəhbərləri var ki, onlar partiyalarının ideoloji yönümünü bilmirlər. Dəfələrlə, müxtəlif birliklərdə olmuşuq. Vəziyyəti çox yaxşı bilirik. Ona görə hesab edirik ki, bu seçkilərə ayrıca getməliyik. Bundan sonrakı hədəfimiz Azərbaycandakı siyasi partiyalar arasında ilk üçlükdə olmaqdır".
AĞ Partiya sədri, 21 saylı Nəsimi seçki dairəsindən namizəd Tural Abbaslı partiyasının seçkilərə bloklar şəklində getməyinin hələ tez olduğunu düşünür:
"Onsuz da belə təşəbbüslər olmamışdı. Heç kəs bizə seçkilərə birgə, blok şəklində getməklə bağlı müraciət etməmişdi. Ayrı-ayrı dairələrdə bizim bəzi siyasi müttəfiqlətimiz var. Biz onları dəstəklədik və dəstəkləyirik də. Funksional əməkdaşlıq oldu. Hələ siyasi münasibətlər formalaşsın, növbəti seçkilərdə siyasi blok kimi məsələlər həllini tapar. Hələlik elə bir mühit təəssüf ki, yoxdur".
Müsavat Partiyasının sədr müavini, partiyanın 21 saylı Nəsimi seçki dairəsindən namizədi Gülağa Aslanlı vurğulayıb ki, seçkiyə blok halında getmək barədə onlara hər hansı təklif olmayıb.
REAL Partiyasının icraçı katibi Natiq Cəfərli öncədən də hansısa partiyalarla blok qurmaq fikirlərinin olmadığını söyləyib:
"Bunu doğru saymırıq.Çünki blok ideoloji olmalıdır. Prinsiplərimizi, proqram sənədlərimizi öncədən elan etmişik. Biz bunu partiyamızın səhifəsində də paylaşmışdıq. Bildirmişdik ki, kim bu tezisləri dəstəkləyirsə, müraciət edə bilər. Koalisiyalar dəyərlər üzərində birləşəndə uğurlu olur. Ona görə də bizim belə bir təşəbbüsümüz olmayıb. Güclü kampaniya apardıqdan sonra namizədlərin hər birinin qalib gəlmə şanslarının yüksək olduğunu düşünürük".
Ədalət Partiyasının sədr müavini Mütəllim Rəhimli isə sualımıza belə cavab verib:
"Əslində, seçkilərə blok şəklində qatılmaq ideyası vardı. Bununla bağlı biz qeyri-rəsmi şəkildə bir neçə partiya sədri ilə danışıqlar aparmışdıq. Prinsip bundan ibarət idi ki, blokda elə partiyalar təmsil olunsun ki, biz Milli Məclisdə fraksiya yarada bilək. Bunun üçün isə 25 nəfər deputatın olması tələb edilir. Çox təəssüf ki, başladığımız bu xoş missiyanı sonradan başa çatdıra bilmədik. Fraksiyanın olması parlament haqqında daha yaxşı imic də formalaşdıra bilərdi və onun ətrafında yaranmiş mənfi imici də dağıda bilərdi. Ümid edək ki, indiki halda da müxalif partiyalardan parlamentə seçilən deputatların sayı fraksiya yaratmaq imkanı verəcək"
