Ülvi Quliyevin vəkili Şahin Quliyev deputatlığa namizədin keçdiyi həyat yolu haqda seçicilərə məlumat verib. Vəkil deyib ki, Ülvi Quliyev 2005-ci ildə seçiclərin böyük əksəriyyətinin etimadını qazanaraq deputat seçilib: “Onun seçicilərin qayğısına necə qaldığını seçicilərindən soruşa bilərsiniz”.

Sonra deputatlığa namizəd Ülvi Quliyev seçicilər qarşısında çıxış edib. Onunla görüşə gəldiklərinə görə seçicilərə təşəkkürünü bildirən deputatlığa namizəd onları 7 noyabr səsvermə günü fəal olmağa çağırıb:

“Demirəm ki, mənə səs verin. Ürəyiniz istəyən, etimadınızı  doğruldacaq namizədə səs verin. Bəzi namizədlər seçicilər qarşısında fantastik vədlər verirlər. Mən belə vədlər verməkdən uzağam. Təbii ki, mən etimadınızı qazanaraq sizlərin deputatı olmaq istəyirəm. Əgər mənə səs verərsəniz sizi Milli Məclisdə layiqincə təmsil edəcəm. Hər birinizin qarşılaşdığı çətinliyə öz problemim kimi yanaşacam.

Hazırda Milli Məclisin deputatıyam. Seçicilərə yalan vədlər verib sonra onu yerinə yetirməməyi qəbul etmirəm. Onu deyə bilərəm ki, bütün gücümü sərf edərək deputat səlahiyyətləri çərçivəsində problemlərinizin həllinə çalışacam. Bu problemlərin həlli əl-ələ verərək birgə fəaliyyət göstərməyimizdən keçir. Azərbaycanın bugünkü inkişafı hamımızın gözü qarşısındadır. Təbii ki, bir vətəndaş olaraq hazırkı inkişaf və uğurlar bizləri çox sevindirir. Ancaq problemlərin olmadığını da iddia etmirik. Söz verirəm ki, sizin xidmətinizdə olacam. Hər bir seçicimə hörmətlə yanaşacam. Nə zaman istəsəniz bizimlə görüşə biləcəksiz”

17 saylı Yasamal üçüncü seçki dairəsindən 14 namizədin olduğunu qeyd edən Ülvi Quliyev bildirib ki, onların bir çoxu şantajla, böhtanla məşğuldur, ədalətli, şəffaf və qanunvericiliyə uyğun təbliğat aparmırlar:
“Mən ad çəkmək istəmirəm. Görünür rəqib güclü olanda onlar başqa yol tapa bilmirlər. Mən isə bu üsullardan tam uzağam. Təbliğat-təşviqat kampaniyası dövründə bir çox görüşlər keçirmişəm. Bu dairədən olan insanların hörmətini, rəğbətini görmüşəm. İnsanların belə münasibəti məndə deputat seçiləcəyimə tam əminlik yaradır. Sizlərin bugünkü görüşə belə fəallıq göstərməyiniz də bunu təsdiqləyir, bir daha mənə səs verəcəyinizə inam yaradır.

Hörmətli seçicilər, ötən seçkilərdə kifayət qədər fəallıq göstərmisiniz. Ancaq 2005-2010-cu illərdə sizləri Milli Məclisdə təmsil edən olmayıb. Bu isə ötən 5 il ərzində müəyyən problemlərin həllində mənfi rol oynayıb. Amma mən Ülvi Quliyev olaraq həmin problemləri həll etməyə, üzərimə düşən vəzifəni layiqincə yerinə yetirməyə hazıram”.

Görüşdə çıxış edən xalq artisti Ramiz Əzizbəyli bildirib ki, Ülvi Quıliyev barədə geniş danışmağa ehtiyac yoxdur:
“Onu nəinki bu dairənin sakinləri, bütün Azərbaycan xalqı tanıyır. Bəzi namizədlər seçicilərə saysız vədlər verirlər, ancaq sonradan bunu unudurlar. Ülvi Quliyev isə az danışıb çox iş görən insanlardandır. Bir sənət adamı kimi sizləri Ülvi Quliyevə səs verməyə çağırıram. Ülvi Quliyev Azərbaycan həqiqətlərini dünyaya çatdıran əsl vətəndaşdır”.

Şəhid anası Ceyran xanım deyib ki, Ülvi Quliyev şəhid ailələrinin, kimsəzizlərin həmişə dayağı olub: “Biz həmişə onun qayğısını görmüşük. Ona görə də hər birinizi qayğıkeş insana səs verməyə çağırıram”.

Tanınmış idmançı, 17 saylı dairənin seçicisi Tahir İbrahimov deyib ki, Ülvi Quliyevi çoxdan tanıyır və o, hamını bu namizədə səs verməyə çağırıb.

Sonda Ü.Quliyev seçiciləri dinləyib, onların problemləri ilə maraqlanıb.