Münbit investisiya mühiti
1995-ci ildə diplomatik münasibətlər yaradan Azərbaycanla Özbəkistan arasında qarşılıqlı əlaqələrin tarixi uzaq əsrlərə gedib çıxır. Bu iki xalqı yaxın milli adət və ənənələr, ümumi dil qrupu, mədəniyyət və din birləşdirir. Hazırda minlərlə azərbaycanlı Özbəkistan cəmiyyətinin sosial, ictimai, iqtisadi və digər sahələrində fəal iştirak edir. Bundan əlavə, Sovet dönəmində dağıdıcı zəlzələdən sonra Daşkəndin bərpasında soydaşlarımız yaxından iştirak etmişlər.
İkitərəfli münasibətlərin inkişafında dövlət başçılarının səfərləri xüsusilə böyük əhəmiyyətə malikdir. Dostluq və qarşılıqlı etimad şəraitində keçən görüşlərdə Azərbaycan ilə Özbəkistan arasında əlaqələrin inkişaf perspektivləri, Cənubi Qafqazda və Mərkəzi Asiyada təhlükəsizlik məsələləri, regional və beynəlxalq problemlər barədə, habelə ölkələrimizi maraqlandıran bir sıra digər məsələlər ətrafında geniş fikir mübadiləsi aparılmışdır. Tərəflər iqtisadi əməkdaşlığın inkişafına, o cümlədən qarşılıqlı mal dövriyyəsinin artırılmasına, nəqliyyat və energetika məsələlərinə, habelə humanitar və mədəni əlaqələrin genişləndirilməsinə hər zaman böyük diqqət yetirmişlər. Səfərlər çərçivəsində Daşkənd şəhərində böyük Azərbaycan şairi Nizami Gəncəvinin, paytaxtımızda isə böyük özbək şairi Əlişir Nəvainin abidəsinin açılışı olmuşdur. Bundan əlavə, ətraf mühitin qorunması, informasiya və kommunikasiya texnologiyaları, dəmiryol nəqliyyatı sahəsində əməkdaşlığın daha da dərinləşdirilməsinə və kombinə olunmuş daşımaların inkişafına dair tədbirlər, vergi sahəsində əməkdaşlıq və informasiya mübadiləsi, məxfi informasiyanın qarşılıqlı surətdə qorunması, humanitar sahədə, ticarət-iqtisadi və elmi-texniki əməkdaşlığın daha da inkişaf etdirilməsi tədbirləri haqqında sazişlər imzalanmışdır.
Bildiyimiz kimi, avqustun 23-də Prezident İlham Əliyev Daşkənddə rəsmi səfərdə olmuşdur. Bu görüşü Özbəkistan-Azərbaycan birgə layihələri üçün yeni başlanğıc hesab etmək olar. Belə ki Özbəkistanda Daşkənd, Qaşqadərya, Azərbaycanda isə, Yevlax, Xankəndi, İmişli və Füzulidə yeni zavod, fabrik, yaşayış binaları, habelə, dostluq bağının salınması nəzərdə tutulmuşdur.
Bu görüşlərdə ölkələrimiz arasında qardaşlıq və dostluq münasibətlərinin uğurla inkişaf etdiyi aydın olur. Həm regionda, həm də beynəlxalq arenada nüfuzu gündən- günə artmaqda olan Azərbaycan və Özbəkistan Respublikaları arasında qarşılıqlı dostluq və qardaşlıq prinsipi əsasında qurulan münasibətlər sürətli inkişafa təkan verən başlıca məqamlardır!
Yaqublu Şəfiqə,
Xəzər rayonu, 237 saylı tam orta məktəbin müəllimi
