Deputatlığa namizəd Jalə Əliyevayanın seçicilərlə növbəti görüşü - FOTOLAR
Parlament seçkilərinin təbliğat-təşviqat kampaniyası çərçivəsində bu gün Zərdab rayonunun Əlvənd kəndində həm adı çəkilən kəndin, həm də ətrafdakı Otmanoba, Şəftəhal, Şahhüseynli, Aşağı Seyidlər kəndlərinin seçiciləri ilə görüşdük. Öncə, Əlvənd kəndində şəhidlərin xatirəsinə ucaldılmış Xatirə Kompleksini və Şəhidlər Muzeyini ziyarət etdik, xatirə kitabına ürək sözlərinizi yazdıq.
Yuxarıda adı çəkilən kəndlərin 200-dən çox nümayəndəsinin iştirak etdiyi görüşdə öncə qəhrəman şəhidlərimizi bir dəqiqəlik sükutla yad etdik.
Sonra ölkəmizdə, eyni zamanda Zərdab rayonunda gedən quruculuq işlərindən geniş bəhs etdik, Prezident İlham Əliyevin Zərdab rayonu ilə əlaqədar olaraq son illərdə verdiyi on yeddi sərəncamın əhəmiyyətindən, məhz bu sərəncamlar sayəsində rayonun əldə etdiyi nailiyyətlərdən söhbət açdıq. Millət vəkillərinin, qanunverici orqanın nümayəndələri olaraq görülən bütün işlərdə xalqı ilə dövləti arasında bir körpü rolunu daşıdıqlarını, ölkədə qəbul edilən qanunların xalqın rifah halının yüksəlməsinə, ümumi mənafeyimizə, dirçəlişimizə və ölkəmizin nüfuzunun güclənməsinə xidmət etdiyini vurğuladıq. Bu günə qədər olduğu kimi, bundan sonra da ən əhəmiyyətli hədəfimizin dövlətimizə sədaqətdən, xalqımıza xidmətdən ibarət olduğunu seçicilərin diqqətinə çatdırdıq.
Görüşdə iştirak edən kənd ağsaqqalları, ziyalılar öz xeyir-dualarını verdilər, bu günə qədər tərəfimizdən rayon üçün görülən işlər, müsbət həllini tapan məsələlər üçün minmətdarlıqlarını bildirdilər.
Kampaniyanın başlandığı 9 avqust tarixindən bəri ötən müddətdə keçirdiyimiz bütün görüşlərdə olduğu kimi, bu günkü görüşümüz də olduqca mehriban, xoş əhval ruhiyəli, səmimi və anlayışlı bir ortamda keçdi.
Bütün seçicilərimə, xüsusilə bu günkü görüşün iştirakçısı olan Əlvənd, Otmaniba Şahhüseynli, Şəftəhal, Aşağı Seyidlər kəndlərinin sakinlərinə bu gözəl görüş üçün ürək dolusu minnətdarlığımı bildirirəm.