119 saylı Ağdam seçki dairəsindən deputatlığa namizəd Şəbnəm Səfərovanın seçicilərlə görüşləri davam edir.-Fotolar
Şəbnəm Səfərova son üç gün ərzində Zəngişalı, Çəmənli kəndlərinin, eləcə də Yeni İmamqulubəyli və Birinci Dördyol qəsəbələrinin mədəniyyət evlərində, Quzanlı qəsəbəsində yerləşən Heydər Əliyev mərkəzində seçicilərlə görüşlər keçirmişdir.
Görüşlərdə öncə ümumilli lider Heydər Əliyevin və Azərbaycanın müstəqilliyi və ərazi bütövlüyü uğrunda Şəhid olan qəhrəman Vətən övladlarının əziz xatirəsi bir dəqiqəlik sükutla yad edilib.
Şəbnəm Səfərova sakinlərlə görüşməyin, söhbətləşməyin onun üçün böyük qürur hissi olduğunu bildirib.
"Namizədliyini irəli sürən, Parlamentdə təmsilçi olmağı arzulayan hər kəs dərk etməlidir ki, bu elə də asan olmayan, məsuliyyətli bir yoldur.
Seçki platformamızı hazırlayarkən ölkə başçısının sərəncamıyla təsdiqlənmiş “Azərbaycan Respublikasının 2022–2026-cı illərdə sosial-iqtisadi inkişaf Strategiyası" və “Azərbaycan 2030: sosial-iqtisadi inkişafa dair Milli Prioritetlər” sənədi əsas götürülmüşdür. Hər bir mandat sahibi qanunverici orqana insanyönümlü qanunların qəbulu üçün təkliflər verməklə yanaşı, seçiciləri ilə müvafiq dövlət qurumları arasında körpü rolunu oynayır.
Bundan əlavə olaraq, bu regionda yaşayan gənclərin dünyanın yeni iqtisadi çağırışlarına və əmək bazarının texnoloji-innovativ tələblərinə uyğun hazırlanması üçün layihələrin icrası əsas hədəflərimdəndir.
Bugünədək əldə etdiyim bilik, bacarıq və təcrübələrimlə hər zaman ölkəmə və dövlətimə xidmət etməkdən qürur duymuşam. Siz seçicilərin güvəni ilə qazanacağım mandat sadəcə bu xidmət üçün daha bir vasitə olacaq.”
Daha sonra Ş.Səfərova seçiciləri suallarını cavablandırıb.
Seçicilər bildiriblər ki, özləri və ailə üzvləri seçkidə aktiv iştirak edərək Şəbnəm Səfərovanı dəstəkləməklə yanaşı yaşadıqları kənd və qəsəbələrdə hər biri həm də onun təbliğatçısı olacaq.
