Yüksək səviyyədə görüşlər müntəzəm xarakter daşıyır
Rusiya və Azərbaycan və iki ölkənin xalqları arasında dostluq və mehriban qonşuluq tarixi ənənələrinə, dərin və humanitar əlaqələrə arxalanır. Hələ ötən əsrdə Ulu Öndər Heydər Əliyevin 1-ci prezidentliyi dövründə dostluq, əməkdaşlıq və qarşılıqlı təhlükəsizlik haqqında 3 iyul 1997-ci il tarixili müqaviləyə, Rusiya Federasiyası və Azərbaycan Respublikası arasında dostluq və strateji tərəfdaşlıq haqqında 3 iyul 2008-ci il tarixli Bəyannamə imzalanmışdır. Bundan başqa, Azərbaycan Respublikasının Prezidenti cənab İlham Əliyev və Rusiya Federasiyasının Prezidenti cənab Vladimir Putinin 1 sentyabr 2018-ci il tarixli Bəyanatına əsaslanaraq, ikitərəfli münasibətlərin Rusiya və Azərbaycan xalqlarının maraqlarına tam şəkildə cavab verəcək, regional və beynəlxalq təhlükəsizliyin və sabitliyin təmin edilməsinə və möhkəmləndirilməsinə töhfə verəcək və yeni müttəfiqlik səviyyəsinə qaldırmağa çalışaraq iki ölkənin siyasi, iqtisadi, mədəni, humanitar, təhsil, sosial sahələrə, eləcə də gənclər arasında əməkdaşlıq və idman sahəsində MDB məkanında inteqrasiya proseslərinin inkişafında maraqlı olduqları BMT Nizamnaməsinin və ATƏT-in qəbul edilən sənədlərinin məqsəd və prinsiplərinə və beynəlxalq hüququn prinsiplərinə riayət edərək, 2022-ci il 22 fevral tarixində Moskva şəhərində 43 bənddən ibarət Müttəfiqlik Bəyannmasəi imzalanır.
2024-cü il 18-19 avqust tarixlərində Rusiya Federasiyasının Prezidenti Cənab Vladimir Putin Azərbaycana səfər etmişdir. Bu səfər xüsusi əhəmiyyət kəsb edirdi. Bu səfərin məqsədi Rusiya ilə Azərbaycan arasında əməkdaşlığın daha da inkişaf etdirilməsi və beynəlxalq, regional məsələlərin müzakirəsi və bu problemlərin həlli yolunda fikr mübadiləsi etmək idi. Bu məqsədlə 19 avqust tarixində dövlət başçıları mətbuata bəyanatla çıxış ediblər.
Hər iki dövlət başçısı bu səfərin ölkələrimiz üçün əhəmiyyətindən, imzalanan sənədlərdən və gələcək perspektivlərdən məlumat verdilər. Prezident İlham Əliyevin qeyd etdi ki, bu gün qəbul edilən sənədlər bir daha dostluq və müttəfiqlik xarakterini təsdiqləyir. Hələ 2022-ci ilin fevralında qarşılıqlı müttəfiqlik haqqında imzalanan Bəyannamənin müddəaları uğurla həyata keçirilir. Cənab Prezident çıxışında Cənubi Qafqazda uzunömürlü sülhün bərpası yeni bir şəraitə yol açdığını bildirdi. Regionda təhlükəsizlik və sabitlik Rusiya ilə Azərbaycan arasında sıx fəaliyyətdən aslıdır. Müstəsna əhəmiyyətə malik olan regional nəqliyyat dəhlizləri, Şimal-Cənub layihəsinin həyata keçirilməsi ilə bağlı məsələlər də bu görüşdə diqqət mərkəzində oldu.
Deyə bilərik ki, Azərbaycanın ərazisində “Şimal-Cənub” dəhlizinin həm dəmir yolu, həm də avtomobil yolu seqmentləri tam şəkildə reallaşdırılıb və uğurla fəaliyyət göstərir. Hazırda bu dəhlizin ötürücülük qabiliyyətini yüksəltmək üçün onun dəmir yolu sahəsinin modernləşdirilməsi işləri aparılır. İl ərzində 15 milyon ton və daha çox – 30 milyon tonadək yüklərin daşınması planlaşdırılır. Hazırkı şəraitdə Rusiya və Azərbaycan, həmçinin bu dəhlizin digər iştirakçıları birgə səylərlə öz fəaliyyətini davam etdirir. Energetika sferasında həm neft-qaz sektorunda, həm də elektrik enerjisi sahəsində vəziyyəti təhlil edən dövlət başçıları, bu istiqamətdə işlərin sürətlə davam etdiyini vurğuladılar.
Azərbaycan Respublikasına dövlət səfərinə dəvətə görə İlham Əliyevə bir daha təşəkkür edən Rusiya Prezidenti Vladimir Putin, qonaqpərvər Azərbaycan torpağında olmaq, inkişaf edən Bakının mənzərələrini seyr etməkdən məmnunluğunu bildirdi. O, qeyd etdi ki, Rusiya Azərbaycanla çoxplanlı dostluq münasibətlərinin inkişafına böyük əhəmiyyət verir. Bu münasibətlərin əsasını bərabərlik, bir-birinin maraqlarını nəzərə almaq və əlbəttə, əsrlər boyu xalqlarımızı birləşdirən sıx insani və mədəni bağlar təşkil edir. Qəbul edilən Birgə Bəyanatda ikitərəfli əlaqələrin bütün kompleksi üzrə gələcək dinamik inkişafın yeni genişmiqyaslı vəzifələri qarşıya qoyuldu. Bu gün imzalanan sənədlər də onların həllinə kömək edəcək.
Danışıqlarda qarşılıqlı faydalı iqtisadi-ticari əməkdaşlığın inkişafına diqqət yetirildi. Bu, qanunauyğundur, çünki Rusiya və Azərbaycan bir-biri üçün mühüm iqtisadi tərəfdaşlardır. Azərbaycan bazarında şirkətlərimiz özünü yetərincə rahat hiss edir. Burada həm “LUKOYL”, həm yığılma istehsalını təşkil edən “KamAZ”, həm də “Sollers”, “UAZ” şirkətləri var. Onlar uğurla fəaliyyət göstərir və inkişaf perspektivlərinə malikdir. Bu şirkətlərin işinə yaradılan şəraitə görə Azərbaycan hakimiyyətinə minnətdarıq deyə, Rusiya dövlət başçısı çıxışına davam etdi. “Transmaşholdinq” fevral ayında Bakı metropoliteni üçün Rusiya vaqonlarının böyük partiyasının istehsalına dair növbəti müqavilə bağlanıldığını vurğulayan V.Putin bu qatarlardan istifadə edənlər də razı qalacaqlarlarına ümidvar olduğunu bildirdi. O, “Şimal-Cənub” layihəsinin reallaşdırılması üzrə birgə planlarımızı da xüsusi qeyd edərək, Hind okeanının sahillərinə çıxmağa və bu marşrutları qarşılıqlı fayda və qarşılıqlı maraq kontekstində istifadə etməyə imkan yaranmasından bəhs etdi.
Rusiya və Azərbaycan çoxtərəfli platformalar daxil olmaqla, həmçinin BMT və Müstəqil Dövlətlər Birliyində öz səylərini sıx əlaqələndirirlər. Bu ilin oktyabrında iki dövlət başçısı MDB Dövlət Başçıları Şurasının iclasında, həmçinin Kazanda keçiriləcək BRICS sammiti çərçivəsində “autriç” formatında görüşəcəklər.
Sonda səfərin yekunlarından tamamilə məmnun olduqlarını bildirən Prezidentlər, bu gün aparılan danışıqlar və əldə olunan razılaşmaların Rusiya-Azərbaycan strateji tərəfdaşlığının gələcəkdə də möhkəmlənməsinə xidmət edəcəklərindən əminliklərini qeyd etdilər.
Qarayev Şikarı
Xəzər rayonu, 123 saylı tam orta məktəbin müəllimi