İkitərəfli əlaqələrin yeni səviyyəsi
İkitərəfli əlaqələrin yeni səviyyəsi
Rusiya Federasiyasının Prezidenti Vladimir Putin 2024-cü ilin 18-19 avqust tarixlərində Azərbaycana rəsmi səfər etmişdir. Bu səfər, Rusiya-Azərbaycan münasibətlərinin daha da inkişaf etdirilməsi, iqtisadi, siyasi və mədəni sahələrdə əməkdaşlığın genişləndirilməsi üçün əhəmiyyətli addım kimi tarixə həkk olunmuşdur. Səfər çərçivəsində Rusiya və Azərbaycan prezidentləri arasında bir sıra mühüm görüşlər keçirilmiş, bu görüşlərdə regional təhlükəsizlik, enerji resursları, ticarət əlaqələri və humanitar əməkdaşlıq mövzularında müzakirələr aparılmışdır.
Ümumilikdə, tarixə nəzər saldıqda Rusiya ilə Azərbaycan arasındakı əlaqələr qədim dövrlərə gedib çıxır. İki ölkə arasında strateji tərəfdaşlıq isə 1991-ci ildə Azərbaycanın müstəqillik qazanmasından sonra yeni bir mərhələyə keçid etmişdir. Rusiya, Azərbaycanı tanıyan ilk ölkələrdən biri olmuş və o vaxtdan bəri iki ölkə arasında müxtəlif sahələrdə möhkəm əlaqələr formalaşmışdır. 2001-ci ildə imzalanan "Dostluq və əməkdaşlıq haqqında müqavilə", ikitərəfli münasibətlərin hüquqi bazasını möhkəmləndirmiş, iki ölkə arasında əməkdaşlığı daha da dərinləşdirmişdir. Bununla yanaşı, 2022-ci ilin fevral ayında Moskva şəhərində "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında" Bəyannamə imzalanmışdır ki, bu mötəbər sənəd ikitərəfli əlaqələri keyfiyyətcə yeni və daha yüksək mərtəbəyə qaldırmışdır. Bu bəyanat, iki ölkənin qarşılıqlı əlaqələrinin hərtərəfli inkişafına töhfə verməklə yanaşı, Qafqaz regionunda sabitliyin təmin olunması və regional təhlükəsizliyin möhkəmləndirilməsi üçün də mühüm rol oynamaqdadır. Bununla bağlı, Azərbaycan Respublikasının Prezidenti cənab İlham Əliyev qeyd etmişdir ki, bu, həm böyük imtiyaz, həm də böyük məsuliyyətdir. Biz bu günə təkidlə, uzun müddət əməkdaşlıq potensialını artırmaqla, səmimiyyətə, mehriban qonşuluğa, praqmatizmə, qarşılıqlı maraqların nəzərə alınmasına əsaslanan münasibətlər qurmaqla gəlib çatmışıq. Bəli, ölkə başçımızın da qeyd etdiyi kimi, iki ölkə arasındakı əlaqələr ən yüksək ali dəyərlərə əsaslanmaqdadır. 18-19 avqust tarixli səfər də bunun bariz göstəricisidir. Səfər çərçivəsində Vladimir Putin Fəxri xiyabana gələrək xalqımızın Ümummilli lideri Heydər Əliyevin və görkəmli oftalmoloq-alim, akademik Zərifə xanım Əliyevanın xatirəsini dərin ehtiramla yad edib, məzarları önünə əklil qoyub. Eyni zamanda, Şəhidlər Xiyabanı ziyarət edilib, şəhidlərin xatirəsi anılaraq “Əbədi məşəl” abidəsinin önünə əklil qoyulub. Bütün bunlar, Rusiya ilə Azərbaycan arasında tarixi və dostluq əlaqələrinə verilən böyük önəmin göstəricisi və Rusiya dövlətinin Azərbaycanın ərazi bütövlüyü və suverenliyinə açıq dəstəyinin təzahürüdür.
Səfər çərçivəsində liderlər məhdud və geniş tərkibdə görüşlər keçirmiş, mətbuata bəyanatlarla çıxış etmişdir. Bu bəyanatlarda ikitərəfli əməkdaşlıq məsələləri və qarşılıqlı maraq doğuran digər mövzular ətrafında fikirlər səsləndirilmişdir. Dövlət başçımız çıxışı zamanı vurğulamışdır ki, bu gün qəbul edilən sənədlər, ilk növbədə, prezidentlərin Birgə Bəyanatı daxil olmaqla, münasibətlərimizin dostluq və müttəfiqlik xarakterini bir daha təsdiqləyir. Əlavə olaraq, çıxış zamanı, iqtisadi-ticari münasibətlər, humanitar əməkdaşlıq, regional təhlükəsizlik və regional nəqliyyat dəhlizləri, Xəzərdə ekoloji vəziyyət və digər mövzularla bağlı fikirlər səsləndirilmişdir.
Daha sonra çıxış edən Rusiya Federasiyasının Prezidenti Vladimir Putin bildirdi ki, Rusiya Azərbaycanla çoxplanlı dostluq münasibətlərinin inkişafına böyük əhəmiyyət verir. O da vurğulandı ki, Rusiya tərəfi səfərin yekunlarından tamamilə məmnundur və bu gün aparılan danışıqlar və əldə olunan razılaşmalar Rusiya-Azərbaycan strateji tərəfdaşlığının gələcəkdə də möhkəmlənməsinə xidmət edəcəkdir.
Son olaraq qeyd etmək istərdim ki, məhsuldar keçən səfər çərçivəsində Azərbaycan və Rusiya arasında bir sıra yeni sazişlər imzalanıb. Bu sənədlər, iki ölkə arasında müxtəlif sahələrdə əməkdaşlığın daha da inkişaf etdirilməsi məqsədini güdür və bu sazişlər Azərbaycanın və Rusiyanın bir-birinə olan strateji bağlılığını daha da gücləndirir.
Samir Hüseynov
Pirallahı rayon İcra Hakimiyyəti başçısı Aparatının Hüquq şöbəsinin müdiri
