Ofelya xanım Bağırbəyova - İrəvan xanlarının yadigarı
Ofelya xanım Bağırbəyova - İrəvan xanlarının yadigarı
İrəvan xanlarının nəslindən, Abbasqulu xan İrəvanskinin və Pənah xan Makinskinin nəticəsi, Əli xan və Tacı xanımın nəvəsi olan Ofelya xanımı 90 illik yubileyi münasibəti ilə evində ziyarət etmək bizə xoş anlar yaşatdı. Yubilyarı təbrik etdik, Qərbi Azərbaycan İcmasının Fəxri Fərmanını təqdim etdik. Gəlişimizdən son dərəcə sevinən Ofelya xanım sanki çoxdan gəlişimizi gözləyirdi. Əsli və nəsli haqqında danışmaqdan yorulmur, ailə albomunda saxladığı XİX əsrin sonuna – XX əsrin əvvəllərinə aid şəkilləri bir-bir bizə göstərir, izahat verirdi. Qərbi Azərbaycan İcması Qadınlar Şurasının sədri Məlahət xanım İbrahimqızı, QAİ Qəyyumlar Şurasının sədri Mürvət Həsənli və mən Onu heyranlıqla dinləyirdik.
Bir qədər sonra həyəcanla bir qrafin gətirdi, “bu, xan babalarımdan qalan yeganə yadigardır, 300 yaşı var, bunun ikinci tayına Ermitajda Birinci Pyotrun masası üzərində rast gəlmişəm”, - dedi. Qrafini heyranlıqla gözdən keçirdik, üstündəki naxışların İrəvan Xan Sarayının divarlarındakı naxışlarla oxşarlığı, az qala eyniliyi dərhal diqqətimizi cəlb etdi. “Bircə arzum var, bu qrafini cənab Prezident İlham Əliyevə təqdim edim. O, İrəvan xanlarının yeganə yadigarına sahib olmağı haqq edən yeganə Şəxsiyyətdir. O, millətimizə tariximizdə analoqu olmayan Zəfər yaşadıb. Üstəlik, onun babası Əziz Əliyevin babası Kərbəlayi Qurbanəli ilə Abbasqulu xan İrəvanskinin qohumluq əlaqələri olub”, - dedi.
Ofelya xanım Bağırbəyova ilə sağollaşanda söz verdik ki, tezliklə yenə görüşəcəyik, çünki hiss etdik ki, onun sinəsində tariximizə dair hələ çox sirlər yatır...
