Olimpiya Oyunları bütün idman yarışları arasında xüsusi mövqeyə sahib yarışdır
Olimpiya Oyunları bütün idman yarışları arasında xüsusi mövqeyə sahib yarışdır
Azərbaycan idmançıları digər idman yarışlarında olduğu kimi bu yarışda da uğurla çıxış edərək xalqımıza sevinc və qürur hissi bəxş etmişlər. Bu uğurlu çıxışın arxasında dövlətimizin düzgün idman siyasəti və idmançılara olan dəstəyi danılmaz faktdır. Azərbaycan höküməti daim gənc nəslin idmana maraq göstərməsinə və müxtəlif idman növlərinin inkişafına dəstək olmuşdur. Bunun nəticəsində idmançılarımız dünya arenasında bir-birinin ardınca uğurlu çıxışlar edərək öz sözlərini deməyi bacarmışlar.
Parisdə keçirilən XXXIII Yay Olimpiya Oyunları da idmançılarımızın uğurlu çıxışları ilə yadda qaldı. 2 qızıl, 2 gümüş və 3 bürünc medal. Xalqımız böyük həyəcanla və fəxrlə bu oyunları izləyərək öz idmançılarına dəstəyini nümayiş etdirmişdir. Eləcə də ölkə başçısı Cənab Prezident İlham Əliyev və birinci vitse-prezident Mehriban Əliyeva da idmançılarımızı təbrik etmiş, onlarla fəxr etdiklərini bildirmişlər. Prezident İlham Əliyev eyni zamanda cari ilin 14 avqust tarixində Olimpiya Oyunlarında medal qazanmış idmançılar və onların məşqçilərini qəbul etmişdir. Görüş zamanı Cənab Prezident idmançılarımızın qazandığı uğurun xalqımıza bəxş etdiyi sevinci dilə gətirmiş və ölkəmizi ləyaqətlə təmsil etdiklərini bildirmişdir. Eyni zamanda qeyd etmişdir ki, 4 ildən bir keçirilən bu nüfuzlu yarışa hər bir ölkə xüsusi hazırlaşır. Azərbaycan da belə ölkələr arasındadır.
Qazanılan uğurlar onu göstərir ki, Azərbaycan güclü idman dövlətidir. Təsadüfi deyil ki, Azərbaycan Olimpiya Oyunlarında dünyanın ən güclü 30 dövləti arasında yer tutur. Müsəlman ölkələri arasında isə ölkəmiz üçüncü yerdədir. Ona görə də bizim idmançılarımız ən yüksək qiymətə layiq olmalıdırlar. Əlbəttə, idman elə bir sahədir ki, burada qələbə də olur, məğlubiyyət də.
Bu gün ölkəmizdə idman ardıcıl surətdə inkişaf edir. Bu Olimpiya Oyunlarında idmançılarımız 5 idman növündə medal qazanmışlar. Bu da Azərbaycanda idmanın bir çox növlərinin inkişaf etdiyini göstərir. Görüş zamanı Prezidentimiz qeyd etmişdir ki, bu uğurlar bizi yeni-yeni qələbələrə ruhlandırmalı və növbəti idman yarışlarına hazırlıq prosesinə indidən başlamalıyıq.
Ölkəmizin hər bir yerində idmanla məşğul olmaq üçün gözəl şərait var. Bunu yeniyetmə və gənclərimizin idman sahələrinə axın etməsi də sübut edir. Görüşün sonunda Cənab Prezident gənc nəsillə fəxr etdiyini söyləmiş və qeyd etmişdir ki, qazanılan uğurlar idmançılarımızın məsuliyyətini artıraraq onların həm yarışlarda, həm də həyatda nümunəvi davranış qaydaları sərgiləməyinə səbəb olur.
Cəfərova Ülviyyə,
Xəzər rayonu, 117 nömrəli tam orta məktəbin müəllimi