Növbəti qələbəmiz
Növbəti qələbəmiz
Ali Baş Komandanımız Prezident İlham Əliyev cari ilin 14 avqust tarixində XXXIII Paris Yay Olimpiya Oyunlarında medal qazanmış Azərbaycan idmançıları və onların məşqçiləri ilə görüş keçirib. Görüş maraqlı anlarla yadda qalıb. Prezident İlham Əliyev ilk növbədə idmançılarımızı və onların məşqçilərini qələbə münasibətilə təbrik edib, onlara öz təşəkkürünü bildirib.
Görüş zamanı Ali Baş Komandanımız öz nitqində idmançılarımızın xalqımızı necə sevindirdiyini, Fransada həyata keçirilən Yay Olimpiya Oyunlarında ölkəmizi ləyaqətlə təmsil etdiklərini, hətta Azərbaycan Bayrağını dəfələrlə ucaltdıqlarını dilə gətirib. O, eyni zamanda, qeyd edib ki, Olimpiya Oyunları bütün digər idman yarışları arasında xüsusi yer tutan bir yarışdır, dörd ildən bir keçirilən idman bayramıdır və əlbəttə ki, hər bir idmançı, hər bir ölkə bu bu yarışa xüsusilə hazırlaşır.
Heç şübhəsiz, bizim Olimpiya Oyunlarındakı uğurlarımız əvvəlki illərdə də, son oyunlarda da göstərir ki, Azərbaycan güclü idman dövlətidir. Olimpiya Oyunlarında yüksək nəticə göstərərək dünyanın ən güclü 30 ölkəsinin arasında yer almışıq - 2 qızıl, 2 gümüş və 3 bürünc medal qazanmışıq. Sözsüz ki, daha çox medallar qazana bilərdik. Amma bu idmandır, idmanda qələbə də olur, məğlubiyyət də olur. Bu Oyunlar bir daha sübut etdi ki, Azərbaycanda idmanın inkişafı ardıcıl surətdə və çoxşaxəli şəkildə gedir.
Bu Oyunlar əsnasında idmançılarımız beş idman növü üzrə medallar qazanmışlar: cüdo, boks, taekvondo, yunan-Roma güləşi, sərbəst güləş. Görüş zamanı Olimpiya çempionu, cüdoçu Hidayət Heydərova söz verildi. O, öz çıxışında bu gün bu görüşə dəvətli olduğu üçün özünü xoşbəxt hiss etdiyini, oyunlar zamanı hər cəhətdən dəstəkləndiyini, Olimpiya çempionu olarkən Ölkə rəhbərliyi tərəfindən edilən təbrik zənginin onu necə sevindirdiyini söylədi.
Azərbaycan Prezidenti qeyd etdi ki, xüsusilə Olimpiya Oyunlarında qazanılan qələbə idmanda da, məişətdə də, həyatda da idmançının üzərinə böyük məsuliyyət qoyur. İdmançılarımızın yalnız məharətləri ilə deyil, həm də yarış zamanı layiqli davranışları ilə seçildiklərini vurğulayan dövlətimizin başçısı bildirdi ki, bu, onların yüksək mənəvi keyfiyyətlərini bütün dünyaya nümayiş etdirdi. Prezident İlham Əliyev, həmçinin, uzun illər Olimpiya Oyunlarında, dünya və Avropa çempionatlarında ölkəmizin adını ucaldan veteran idmançılara da öz minnətdarlığını ifadə etdi. O vurğuladı ki, biz bu qələbələrlə kifayətlənməməli, növbəti Olimpiya Oyunlarında daha yaxşı nailiyyətlər nümayiş etdirmək üçün hazırlıq işlərinə indidən başlamalıyıq. Görüşün sonunda Ali Baş Komandanımız idmançılarımıza yeni-yeni uğurlar arzuladı.
Abdullazadə Türkanə,
Xəzər rayonu, 183 nömrəli tam orta məktəbin müəllimi