Əziz dostlar, dəyərli şəmkirlilər
Əziz dostlar, dəyərli şəmkirlilər,
Son 5 il ərzində ölkəmiz çox çətin günlərdən və böyük sınaqlardan keçdi - müharibə, pandemiya. Eyni zamanda bu dövrdə tarixi nailiyyətlər əldə etdik. Torpaqlarımızın işğaldan azad edilməsi və tarixi ədalətin bərpası hər birimizə sonsuz sevinc bəxş etdi. Bu gün müstəqilliyimizi bərpa etdikdən sonra bütöv Azərbaycan torpaqlarında keçiriləcək ilk tarixi parlament seçkilərində iştirak etmək isə qürurvericidir.
„Yeni dövrə Yeni Azərbaycanla“ şüarı ilə Yeni Azərbaycan Partiyası tərəfindən deputatlığa namizədliyim yenidən Şəmkir kənd seçki dairəsindən irəli sürülüb. Bu böyük etimad üçün Yeni Azərbaycan Partiyasının sədri cənab Prezident İlham Əliyevə öz dərin minnətdarlığımı bildirirəm. Həm təşviqat kampaniyası çərçivəsində və əgər seçilsəm, sonraki fəaliyyətimdə bu etimadı vicdanla, var gücümlə doğrultmağa çalışacam. Bu böyük etimad eyni zamanda özü ilə birlikdə böyük bir məsuliyyət gətirir. Bu məsuliyyətin ilk mərhələsi də məhz bu gündən etibarən seçicilərlə səmərəli təşviqat kampaniyası aparmaq və təmsil etdiyim Yeni Azərbaycan Partiyasının seçki platformasını seçicilərimizə çatdırmaqdır.
5 il deputat kimi çalışdığım dövrdə hər zaman əlimdən gəldiyi qədər seçicilərlə daim ünsiyyətdə oldum və müraciətlərinin müsbət həllinə çalışdım. Müsbət həllinə nail olduğumuz və ola bilmədiyimiz müraciətlər oldu. Ancaq əminliklə deyə bilərəm ki, bütün əsaslı müraciətlərin həllinə xüsusi diqqətlə yanaşdıq. Şəhid ailələrimiz və qazilərimizlə demək olar ki, bir ailə olduq, onların dərdinə, acısına əlimizdən gəldiyi qədər şərik olduq. Bunu deputat kimi yox sadə, vətənini sevən bir Azərbaycan övladı kimi sevgi ilə, minnətdarlıqla etdik.
Mən vətənimi sevirəm və mənim üçün vətəni sevmək ilk öncə öz işini layiqincə və vicdanla yerinə yetirməkdir. Vətəni sevmək insanlarına xidmət etməkdir, vətəni sevmək problemlərdən qaçmamaq və onların üzərinə gedib həll etməkdir!