İnkişaf edən münasibətlərin önəmli göstəricisi
İnkişaf edən münasibətlərin önəmli göstəricisi
09 avqust 2024-cü il tarixdə Azərbaycan Respublikasının Prezidenti İlham Əliyev Qazaxıstanın paytaxtı Astanada Mərkəzi Asiya və Azərbaycan Respublikasının Dövlət Başçılarının görüşündə iştirak edib. Yüksək səviyyəli görüşdə dövlət başçımız əhatəli nitqlə çıxış edərək bir çox vacib məqamlara toxunub. Çıxışda son illərdə Azərbaycan və Mərkəzi Asiya dövlət başçılarının yüksək templə inkişaf edən əlaqələri, intensivləşən səfərləri, müxtəlif sferalarda xüsusilə də hərbi, enerji və beynəlxalq təşkilatlar daxilində qarşılıqlı ifadə olunan dəstəyi xüsusi diqqət çəkib.
Prezident İlham Əliyev çıxışında qeyd etmişdir ki, son iki il ərzində Mərkəzi Asiya ölkələrinə 16 səfəri baş tutmuşdur. Eyni zamanda, Mərkəzi Asiya ölkə başçılarının ölkəmizə 15 səfəri reallaşmışdır. Bu, həqiqətən də diqqətçəkən nüansdır. Təbiidir ki, bu səfərlər qarşılıqlı əlaqələrin möhkəmlənməsi üçün mühüm rol oynayır. Bu görüşlərdə, iki ölkə arasındakı ikitərəfli əlaqələrin inkişafı üçün yeni anlaşmalar imzalanmış, strateji əməkdaşlıq, enerji sahəsində ortaq layihələr və iqtisadi əməkdaşlıq məsələləri müzakirə olunmuşdur. Həmçinin, beynəlxalq arenada birgə fəaliyyətlər, regionun təhlükəsizliyi və sabitliyi ilə bağlı məsələlər də gündəmdə olmuşdur. Beləliklə, Azərbaycan və Mərkəzi Asiya ölkələri arasındakı əlaqələrin intensivləşməsi, regionun geosiyasi və iqtisadi mənzərəsinə yeni dinamika qatıb. Bu əməkdaşlıq, tərəflər arasında qarşılıqlı fayda və etimadın artmasına, həmçinin regionda sülh və sabitliyin möhkəmlənməsinə töhfə verir. Gələcəkdə bu əlaqələrin daha da genişlənəcəyi və hər iki tərəfin inkişafına təkan verəcəyi şübhə doğurmur.
Ölkə başçımızın çıxışında daha bir diqqət çəkən başlıq dünyada artan təhdid və çağırışlar fonunda müdafiə və təhlükəsizlik sahəsində əməkdaşlığın artırılması tələbatı ilə bağlı oldu. Məlumdur ki, son bir neçə ildə dünyanın müxtəlif bölgələrində bir çox qanlı münaqişə ocaqları yaranmışdır. Bu münaqişələr dünya nizamını, eləcə də beynəlxalq hüququ təhdid etməkdədir. Buna qarşı Azərbaycan və digər dövlətlər öz ölkəsini və xalqını qorumaq üçün etibarlı tərəfdaşlarla əlaqələrini gücləndirməli və hərbi sahədə hazırlığını artırmalıdır. Azərbaycan da öz işini məhz bu istiqamətdə quraraq qardaş Türkiyə Cümhuriyəti və ortaq mədəni dəyərlərə sahib olduğu Mərkəzi Asiya ölkələri ilə hərbi sahədə əməkdaşlığını günü-gündən artmaqdadır. Bu mənada, ötən ay Qazaxıstan Respublikasında baş tutan “Birləşdik-2024” beynəlxalq əməliyyat-taktiki komanda-qərargah təlimi xüsusilə vurğulanmalıdır. Azərbaycan, Qazaxıstan, Qırğızıstan, Tacikistan və Özbəkistan respublikalarının Müdafiə nazirlikləri arasında imzalanmış birgə plana əsasən, Qazaxıstanın Aktau şəhərində keçirilən "Birləşdik-2024" beynəlxalq əməliyyat-taktiki komanda-qərargah təlimi iştirakçı ölkələrin silahlı qüvvələrinin müxtəlif şəraitlərdə birgə hərbi əməliyyatlar aparmaq qabiliyyətini sınaqdan keçirmək üçün təşkil olunmuşdur. Bu təlim, gələcəkdə birgə hərbi əməliyyatların uğurlu həyata keçirilməsi üçün vacib təcrübə təmin etməklə müxtəlif ölkələrin hərbi qüvvələri arasında birliyin və etimadın artmasına şərait yaradacaqdır.
Beləliklə, Prezident İlham Əliyevin Astanada Mərkəzi Asiya və Azərbaycan Respublikası Dövlət Başçılarının görüşündə iştirakı və çıxışı, Azərbaycan ilə Mərkəzi Asiya ölkələri arasında əməkdaşlığın daha da dərinləşdirilməsi və strateji tərəfdaşlığın inkişafı üçün mühüm bir addım oldu. Şübhə yoxdur ki, bu görüş, mühüm bir platforma olaraq, gələcəkdə də mühüm nəticələrə gətirib çıxaracaqdır.
Süpay Məmmədov
Pirallahı rayon İcra Hakimiyyəti başçısı Aparatının
Vətən müharibəsi iştirakçıları və şəhid ailələri ilə işin təşkili şöbəsinin müdiri
