Yeni müharibə: İran İsrailə hücum edəcək - 24 saat ərzində...
HƏMAS lideri İsmayıl Haniyənin Tehranda öldürülməsindən sonra İranın İsrailə hücum edəcəyi gözlənilir.
Gununxeberı.az-ın məlumatına görə, İsrail və Qərb mətbuatı hücumun tezliklə başlaya biləcəyini yazır.
İran Haniyənin öldürülməsinə görə İsrailin məsuliyyət daşıdığını bildirib. İsrail hücumda iştirak etdiyini təsdiqləməyib. Tehran hücuma görə cavab veriləcəyinə, İsraildən qisas alınacağına söz verib.
Qeyd olunur ki, hücum İranın aprel ayında Suriyada öldürülən generallara görə İsrailə birbaşa endirdiyi zərbələrdən daha güclü ola bilər.
Bir neçə Qərb mətbuatı İranın avqustun 5-də hücum edəcəyini bildirir. "Axios" portalı isə yazır ki, ABŞ İranın İsraili dəqiq nə vaxt vurmaq niyyətində olduğunu bilmir. Məlumata görə, ABŞ dövlət katibi Antoni Blinken G7 ölkələrindən olan həmkarlarına bildirib ki, Vaşinqton hücumun 24-48 saat ərzində olacağını gözləyir.
Blinken hərəkətləri ən yaxın müttəfiqləri ilə əlaqələndirmək üçün iclas çağırıb. Onun fikrincə, nəticələri minimuma endirmək üçün ölkələr İran və Hizbullaha diplomatik təzyiq göstərməlidir. Dövlət katibinin fikrincə, bu, “total müharibənin qarşısını almaq üçün ən yaxşı şansdır”.
İsrail Baş naziri Benyamin Netanyahu da ordu və kəşfiyyat qurumları ilə İranın hücum ehtimalını müzakirə edib. Görüşdə müdafiə naziri Yoav Qalant, İsrail Ordusunun Baş Qərargah rəisi Herzi Halevi, MOSSAD-ın rəhbəri David Barnea və Baş Təhlükəsizlik Xidmətinin (əks-kəşfiyyat) rəhbəri Ronen Bar iştirak edib.
İsrail mediası yazır ki, avqustun 4-də baş tutan görüşdə İran tərəfdən hücum qaçılmaz hesab edilərsə, ona qarşı qabaqlayıcı zərbənin endirilməsinin mümkünlüyü müzakirə olunub. Belə bir addımın yalnız İranın hücum niyyətini təsdiqləyən kəşfiyyat məlumatı olması şərti ilə mümkün olacağı bildirilir. Qərb rəsmiləri İsrailə qarşı hücumda Livandakı Hizbullah hərəkatının da iştirak edəcəyini düşünür.
Regionda gərginliyin artdığı bir vaxtda ABŞ Mərkəzi Komandanlığının rəhbəri Maykl Kurilla bölgəyə səfər edib. Onun İsrailin müttəfiqlərinin silahlı qüvvələrinin hərəkətlərini əlaqələndirmək üçün regiona səfər etdiyi bildirilir.
Bundan əvvəl Pentaqon İsraili qorumaq üçün Yaxın Şərq regionuna əlavə qüvvələr, o cümlədən kreyserlər və esmineslər göndərdiyini açıqlayıb.
Xatırladaq ki, aprelin 14-də İran Suriyada 7 zabitinin öldürülməsindən sonra İsrail ərazisinə birbaşa hücum edib. Müxtəlif mənbələrə görə, hücumda bir neçə yüz raket və pilotsuz uçuş aparatı, o cümlədən "Şahed" kamikadze dronları, "Fəttah" və "Fəttah-2" raketləri istifadə esilib. İsrail ordusunun məlumatına görə, İran ümumilikdə üç yüzdən çox hərbi sursat və PUA buraxıb.
