Şuşada Media Diplomatiyası
21-23 iyul 2023-cü il tarixlərdə Şuşa şəhərində II Şuşa Qlobal Media Forumu baş
tutdu. Azərbaycan Respublikasının Prezidenti yanında Strateji Araşdırmalar Mərkəzi
tərəfindən təşkil olunan Forum müxtəlif ölkələrdən gəlmiş media nümayəndələrini,
jurnalistləri, siyasi ekspertləri və digər mütəxəssisləri bir araya gətirdi. Əsas məqsədi
qlobal medianın çağırışları, gələcək trendlər və informasiya müharibələri kimi mövzuları
müzakirə etmək olan Forum çərçivəsində, həmçinin, beynəlxalq jurnalistika və media
etikasının inkişafı, dezinformasiyaya qarşı mübarizə, rəqəmsal transformasiya və media
azadlığı mövzuları da müzakirə edildi. Tədbir çərçivəsində bir sıra panel müzakirələri,
çıxışlar və təlimlər keçirildi.
Ötən il olduğu kimi bu il də dövlətimizin başçısı cənab Ilham Əliyev forumun
açılış mərasimində iştirak və çıxış etdi. Azərbaycan Prezidenti müxtəlif ölkələrin media
nümayəndələrinin suallarını cavablandıraraq ölkəmizin və regionumuzun gələcəyi ilə
bağlı vacib fikirlər səsləndirdi. Çıxışın əsas məqamlarını Qarabağın yenidənqurulması və
Şuşanın əhəmiyyəti; regionda sülh və sabitlik; enerji təhlükəsizliyi və iqtisadi inkişaf;
beynəlxalq əməkdaşlıq və investisiya; dezinformasiya və media azadlığı mövzuları təşkil
etdi. Ayrı-ayrılıqda hər biri aktuallığı ilə seçilən bu mövzulardan dezinformasiya və
media azadlığı mövzusu xüsusilə diqqət çəkdi. Çünki, Azərbaycan uzun illər boyu bu
məsələdən əziyyət çəkib. Müstəqilliyinin ilk dövrlərində, daha dəqiq Birinci Qarabağ
müharibəsi dövründə erməni tərəfinin açıq dezinformasiyasının nəticəsi olaraq təcavüzə,
işğala, depostasiyaya məruz qalan ölkəmiz eyni zamanda sanksiyalara da məruz qalmışdı.
Erməni tərəfinin dezinformasiyaları, xüsusilə Qərb mediasında geniş yayılmış və ictimai
rəyin Azərbaycana qarşı formalaşmasına səbəb olmuşdu. Ermənistanın müxtəlif
ölkələrdəki lobbiçilik fəaliyyətləri də dezinformasiya kampaniyalarının tərkib hissəsi idi.
Bu lobbilər, qərar qəbul edənlərə və siyasətçilərə təhrif olunmuş məlumatlar təqdim
edərək, Azərbaycanın maraqlarına zərbə vurmağa çalışırdılar. Təəssüf ki, həmin dövrdə
dezinformasiya kampaniyaları, beynəlxalq ictimai rəyi Azərbaycan əleyhinə çevirməyi
bacardı. Beynəlxalq təşkilatlar və dövlətlər, Ermənistanın təqdim etdiyi məlumatlar
əsasında qərarlar qəbul etməyə başladılar. Eyni dövrdə, ölkəmizdəki yarıtmaz
siyasətçilərin səriştəsizliyi səbəbindən vəziyyət daha da acınacaqlı bir hala çevrilmiş və
ölkəmiz informasiya blokadasının məngənəsində sıxışıb qalmışdı. Bu mənfi gedişatı
dayandırmaq və ölkənin gələcəyini təmin etmək isə Azərbaycan xalqının dahi oğlu
Heydər Əliyevin yorulmaz fəaliyyəti ilə mümkün oldu. Heydər Əliyev Azərbaycanın
beynəlxalq təşkilatlara üzvlüyünü təmin etmək, müxtəlif ölkələrlə diplomatik əlaqələr
qurmaq və mövcud əlaqələri genişləndirmək üçün intensiv iş aparmış, yerli və xarici
jurnalistlərlə mütəmadi görüşlər keçirmiş, onlara Azərbaycan reallıqları haqqında
məlumat vermişdir. Bununla yanaşı, ölkədə azad mətbuatın inkişafı və informasiya
azadlığının təmin edilməsi üçün də müxtəlif tədbirlər görmüşdür. Bütün bunların nəticəsi
olaraq Azərbaycan həqiqətləri nəhayət dünyaya çatdırılmağa başlanmış, informasiya
blokadası yarılmışdır. Sonrakı dövrdə də Prezident İlham Əliyevin qətiyyətli və
məqsədyönlü fəaliyyəti ilə Azərbaycan reallıqları dünya ictimaiyyətinə çatdırılmağa
davam etdi. Xüsusilə, 2020-ci ildə böyük qələbəmizlə yekunlaşan 44 günlük Vətən
müharibəsində cəbhədə olduğu qədər informasiya müstəvisində də gərgin savaş getdi.
Qürurla deyə bilərik ki, Prezident İlham Əliyevin rəhbərliyi ilə ölkəmiz bu savaşdan da
qalib olaraq ayrıldı. Həmin günlərdə dövlət başçımız demək olar ki hər gün xarici
mediaya müsahibələr verir, onların az qala hücüm həddinə çatan ittihamlarını yerindəcə
sübutlarla məhv edirdi. Bunun nəticəsi idi ki, böyük qələbəmiz çox qısa zaman kəsiyində
hər kəs, o cümlədən dünyanın güc mərkəzləri tərəfindən qəbul edildi. Ancaq, təəssüf ki,
ölkəmizə qarşı media hücumları hələ də keçmişdə qalmayıb. Ölkəmizin Birləşmiş
Millətlər Təşkilatının İqlim Dəyişmələri üzrə Çərçivə Konvensiyasının Tərəflər
Konfransının 29-cu sessiyasına ev sahibliyi edəcəyi elan olunduqdan sonra da ölkəmiz
sistemli şəkildə bu hücumlara məruz qalmaqdadır. Ölkə başçımızın Forumdakı çıxışında
qeyd etdiyi kimi, bizim namizədliyimiz və ev sahibliyimizlə bağlı qərar verildikdən sonra
- növbəti həftə Qərb mediasında bizə qarşı hücumlar başladı. Bu, gözlənilən bir hal idi.
Bəli, hər birimiz dərk edirdik ki, beynəlxalq hüquqla təsdiq olunan haqlı mübarizəmiz
zamanı belə, bizi günahlandıranlar əlbəttə ki, belə böyük uğur zamanı da Azərbaycanı
qaralamaqdan çəkinməyəcəklər. Ancaq, hər necə olsa da dövlətimiz öz yolunda
qətiyyətlə irəliləyir və milli maraqlarımızın təmin olunması yolunda qarşıya çıxan
istənilən əngəli dəf etməyə qadir olduğunu sübut edir. Şübhə yoxdur ki, bu günə qədər ev
sahibliyi etdiyimiz bütün beynəlxalq tədbirlərdə olduğu kimi, COP29 da ən yüksək
səviyyədə baş tutacaq və ölkə başçımızın ali rəhbərliyi ilə Azərbaycan bütün qərəzli
yanaşmalara rəğmən öz adını bir daha dünyaya duyuracaq.
Xəyalə Cavanşirli
Pirallahı rayon İcra Hakimiyyəti başçısı Aparatının
İctimai-siyasi və humanitar məsələlər şöbəsinin baş məsləhətçisi
