Mətbuat cəmiyyətin güzgüsüdür
Mətbuat cəmiyyətin güzgüsüdür
Bu gün milli-mənəvi dəyərlər əsasında qurulan mətbuatımızın yarandığı gündən düz 149 il keçir. Milli mətbuatımızın bünövrəsi 1875-ci il iyulun 22-də "Əkinçi" qəzetinin ilk sayının nəşri ilə qoyuldu. Bütün Qafqazda böyük əks-səda doğuran bu qəzetin naşiri də, redaktoru da, korrektoru da Azərbaycan milli maarifçilik hərəkatının banilərindən biri, təbiətşünas alim Həsən bəy Zərdabi idi. Hər il 22 iyul tarixi ölkəmizdə Milli Mətbuat və Jurnalistika Günü kimi qeyd olunur. Milli oyanışın yeni mərhələsini təmsil edən "Əkinçi" qəzetinin başlanğıcını qoyduğu bu yol neçə-neçə mətbu və ədəbi məktəbin formalaşma prosesinə təkan verdi, xalqın maariflənməsinə, milli-azadlıq hərəkatının güclənməsinə birbaşa öz güclü təsirini göstərdi. Tarixin müxtəlif ictimai-siyasi mərhələlərində bərkiyib formalaşmış Azərbaycan mətbuatı xalqa, cəmiyyətə, insana xidmət borcunu şərəflə yerinə yetirdi.
"Əkinçi" həm də Azərbaycanda ictimai fikrin canlanmasına təkan verdi. Qəzetin adı "Əkinçi" olsa da, burada qabaqcıl mütərəqqi ideyalar təbliğ olunurdu. Ümumiyyətlə, xalqımızın ana dilində oxuması çox əlamətdar bir hadisə idi. Bu qəzet öz növbəsində ana dilinin saflığı, zənginləşməsi uğrunda mübarizə aparırdı. Böyük ziyalı, işıqlı insan H.Zərdabi həyatı boyu, qəzetin səhifələrindəki yazı ilə xalqına fayda verməklə yanaşı, Azərbaycanda peşəkar teatrın bünövrəsini qoydu, xeyriyyə cəmiyyəti açdı, Bakı Realnı Məktəbində müəllimliyi və maarifçiliyi inkişaf etdirdi. "Əkinçi" özündən sonra "İrşad", "Həyat", "Azərbaycan" qəzetlərinin, "Molla Nəsrəddin" jurnalının meydana çıxmasına yol açdı.
Ümumiyyətlə, xalqı maarifləndirməyin yeganə çıxış yolu mətbuatdır. “Əkinçi” qəzeti ilə əsası qoyulan mətbuatımız bu gün özünün ən yüksək inkişaf mərhələsinə çatıb.
Ümummilli lider Heydər Əliyev jurnalistlərə olan qayğısı və diqqəti ilə hər zaman xüsusi olaraq seçilmişdir. Heydər Əliyev jurnalistlərin dostu kimi qiymətləndirilirdi. O çıxışlarından birində demişdir: “Mən istəyirəm ki, jurnalistlərlə bizim dostluğumuz daimi olsun. Bilin, mən jurnalistləri daim sevmişəm”. Ulu Öndərin layiqli davamçısı, ölkə başçımız İlham Əliyev də mətbuatın inkişafına diqqət və qayğısını əsirgəməmişdir. Jurnalistlərin əməyi hər zaman dövlətimizin başçısı İlham Əliyev, Azərbaycanın Birinci vitse-prezidenti Mehriban xanım Əliyeva tərəfindən yüksək dəyərləndirilmişdir. Azərbaycan hökuməti hər zaman mətbuatın azad inkişafına diqqət yetirmiş, onun maddi-texniki bazasının möhkəmləndirilməsi və jurnalistlərin sosial müdafiəsinin gücləndirilməsinə önəm vermiş, KİV-lərin cəmiyyətdə rolunu yüksək dəyərləndirmişdir.
Mətbuat cəmiyyətin güzgüsüdür. Jurnalistikada dəqiqlik və vicdanlılıq deyilən prinsiplər var. Ölkəmizdə kifayət qədər təcrübəli, peşəkar jurnalistlər mövcuddur. Vətən müharibəsi dövründə ön cəbhədə döyüşən əsgərlərimiz kimi, arxa cəbhə rolunu oynayan jurnalistlərimiz də peşə borcunu yerinə yetirmək məqsədilə düşmənlə mübarizə aparmalı oldular. Ordumuzun gücünü, əzmini, yenilməz olduğumuzu bizə və bütün dünyaya çatdırdılar. Azərbaycan Qarabağ müharibəsindən qalib çıxdı. Azərbaycan mediası da qalib ölkənin mediasına çevrildi. Zaman keçdikcə mətbuatımız daha da güclənəcək və saflaşacaq. Milli Mətbuat Günü münasibətilə bütün jurnalistləri və mətbuat orqanlarında çalışan işçiləri təbrik edir, onlara işlərində uğurlar və müvəffəqiyyətlər arzu edirəm. Qəlbiniz işıqlı, gözünüz nurlu, qələminiz iti olsun.
Fidan Qocayeva,
Pirallahı Rayon İcra Hakimiyyətinin əməkdaşı