Ərazilərin abadlaşdırılması və səliqə-səhmanın yaradılması tədbirləri çərçivəsində Yasamal Rayon İcra Hakimiyyətinin başçısı Elşad Həsənov rayonunun bir sıra küçələrinə baxış keçirib. İcra başçısı kommersiya obyektlərinin fəaliyyətinin tənzimlənməsi, səkilərin boşaldılması, küçə infrastrukturunun vahid standart əsasında qurulmasına dair RİH-in məsul şəxslərinə tapşırıq və tövsiyələrini verib.
"Gununxeberı.az " xəbər verir ki, baxış zamanı səkiləri zəbt edərək piyadaların hərəkətini çətinləşdirən, küçələrdə antisanitar vəziyyət yaradaraq pərakəndə ticarətlə məşğul olan satıcılar aşkarlanıb. Həmin şəxslərlə maarifləndirici söhbətlər aparılaraq yalnız müəyyən olunan yerlərdə ticarətlə məşğul olmağın mümkünlüyü diqqətlərinə çatdırılıb.
Qayadaları pozan şəxslərə xəbərdalıq edilib və onlara belə halların təkrarlanacağı təqdirdə İnzibati Xətalar Məcəlləsinin 454-cü maddəsi ilə protokol tərtib olunacağı bildirilib. Bundan əlavə, piyadaların və nəqliyyatın hərəkətinə mane olan standartdankənar reklam lövhələrin səkilərdən və yol kənarlarından götürülməsinə dair tapşırıqlar verilib.
Yasamal Rayon İcra Hakimiyyəti tərəfindən ayrı-ayrı sahibkarlar və bəzi iş adamları tərəfindən səkilərin və hərəkət yollarının üzərində, yaşayış binalarına bitişik yerlərdə, yaşıllıq zolaqlarında, məhəllələrdə vətəndaşların istirahəti üçün nəzərdə tutulmuş yerlərin, keçid meydançalarının zəbt olunmaqla burada inşa olunmuş müxtəlif təyinatlı tikili və obyektlərin sökülməsi, yaşıllıqların hasarlarının sökülərək ərazilərin təmizlənməsi, obyektlərin qarşısına yığılmış malların, səyyar reklam şitlərinin yığışdırılması, binaların fasadlarının estetik görünüşünə xələl gətirən yöndəmsiz reklamların çıxarılması ilə bağlı işlər aparılır.
Həmçinin bu ərazilərdə tikilən bir sıra müxtəlif təyinatlı obyektlərin sənədləri araşdırılır. Araşdırmalar nəticəsində müəyyən olunmuş pozuntuların aradan qaldırılması və lazım gələrsə tikililərin sökülməsi üçün müvafiq qaydada məhkəməyə müraciət olunacaq.
Bu tədbirlərin əsas məqsədi Yasamal rayon sakinlərinin sosial və asudə şəraitinin yaxşılaşdırılması, vətəndaşların istirahətinin səmərəli təşkili, onları narahat edən amillərin aradan qaldırılmasıdır.
