Azərbaycan mətbuatı qlobal informasiya şəbəkəsinin bir parçasıdır
Azərbaycanımızın bütün tarixi kimi Mətbuat Tarixi də qədim köklərə söykənir. Bu gün artıq Milli Mətbuatımızın yaradılmasından 149 il ötür.
Milli Mətbuatımızın əsası 1875-ci il 22 iyulda ilk nəşrinə başlayan "Əkinçi" qəzeti ilə qoyulmuşdur. Həmin əsrdə bu bizim xalq üçün böyük nailiyyət idi. Çünki xalqımız mütəmləkə əsarətində idi. Elə bir əsarət ki, xalqımıza öz milli, dini, mənəvi kimliyini unutdurmağa çalışırdılar. "Azərbaycanlı" kəlməsini işlətmək qadağan olunduğu halda belə, biz Azərbaycan dilində ilk qəzetimizi nəşr etdirdik. Sözsüz ,bu uğurlara görə keçmiş ziyalılarımıza dərin təşəkkür düşür. Bu tarixi gündən sonra Azərbaycan xalqı bir "xalq" olaraq özünü dərk etməyə başladı. Ona görə də hər il bu günü böyük bir qürur hissi ilə qeyd etməliyik.
"Əkinçi" qəzetinin nəşri 1877-ci ildə rus-osmanlı müharibəsi dönəmində siyasi məqalələrə yol verildiyi üçün dayandırıldı. Amma bu azərbaycandilli mətbuat tarixində sadəcə bir fasilə idi. XX əsrin əvvəllərində mətbuatımız yenidən zənginləşdi. "Kəşkül" , " Ziya", "Fiyuzat", "Açıq söz", "Molla Nəsrəddin" və s. kimi qəzet və jurnallarımız nəşr olundular.
XX əsrin sonlarında Azərbaycan öz müstəqilliyini bərpa etsə də, mətbuat üzərində senzura vardı. Ona görə də bu sahəyə o qədər də inam, maraq yox idi. Məhz, 1993-cü ildən Ümumumilli liderimiz Heydər Əliyevin 2ci dəfə hakimiyyətə gəlişindən sonra mətbuatımız heç olmadığı qədər canlandı, zənginləşdi, etibar qazandı. Nəhayət , 1998-ci ildə mətbuat üzərində senzura artıq ləğv olundu. Ümumilli liderimiz çıxışlarında hər zaman bütün peşə sahiblərinə hörmət duyduğunu, jurnalistlərə isə ayrıca sevgisini bildirmişdir. Ona görə də daim ölkədə KİV vasitələrinin inkişafına yol açmaq üçün bu sahənin maddi-texniki bazasının zənginləşdirilməsinə, yaxşılaşdırılmasına, əçatanlığına, jurnalistika fakultələrinin daha çox açılmasına diqqət yetirmişdir. Hətta mətbuat ildönümlərinin qeyd edilməsini belə ilk dəfə Heydər Əliyev gündəmə gətirərək 2000-ci ildə Sərəncam verərək Milli Mətbuatımızın 125 illik yubileyi qeyd edilmişdir. Bu ənənəni davam etdirən möhtərəm prezidentimiz İlham Əliyev də dövlətimizin hər bir sahəsində abadlıq, quruculuq işləri apardığı kimi mətbuat sahəsində də geniş islahatlar aparır. Buna görə də KİV nümayəndələrinə dərin hörmət və diqqət ayıraraq, onlara peşələrini layiqincə daha rahat formada yerinə yetirmələri üçün əlindən gəldiyi qədər yüksək şərait yaradır. Hətta 2013-cü ildə onların əksəriyyətini mükafatlandıraraq mənzil hədiyyə etmişdir.
2021-ci ildə "Azərbaycan Respublikasının Medianın İnkişafı Agentliyi" yaradılmışdır. Artıq informasiya-kommunikasiya texnologiyalarının inkişafı fonunda jurnalistlərin əhəmiyyəti daha da artıb. Zəfər tariximiz olan 44 günlük Vətən Müharibəsində jurnlalistlərimiz də arxa cəbhədə dayanaraq xalqımıza müzəffər ordumuzun qəhramanlıqla qazandıqları xəbərləri şəffaflıqla çatdırıb bizi qürurlandırıblar.
Bu gün Azərbaycandakı siyasi hakimiyyət özünü məhz söz azadlığında, demokratik hüquqların bərqərar olunmasında , mətbuatın tam şəffaflığında göstərir. Bu gün artıq Azərbaycan dünyanın əksər ökələri ilə də mətbuat əməkdaşlığı qurmaqdadır.
Hüseynova Ülkər,
Xəzər rayonu, 117 nömrəli tam orta məktəbin müəllimi
