Azərbaycan-Pakistan münasibətlərində yeni dövr başlayır
Azərbaycan Respublikasının xarici siyasət kursunda dünya dövlətləri ilə qarşılıqlı dostluq münasibətləri əhəmiyyətli yer tutur. Əksər Asiya ölkələri ilə olduğu kimi Pakistan Respublikası ilə də ölkəmizin qarşılıqlı dostluq münasibətləri dərin köklərə malikdir. Əsrlər boyu xalqlarımızın dostluq münasibətlərinin inkişaf etməsində ortaq mədəni köklər, ortaq din və ortaq tarixi keçmişə sahib olmamız mühüm rol oynamışdır. Azərbaycan və Pakistan arasındakı münasibətlər olduqca güclüdür və illər ərzində müsbət istiqamətdə inkişaf edib. Bu münasibətlər siyasi, iqtisadi, müdafiə və mədəniyyət sahələrində ikitərəfli əməkdaşlığa əsaslanır.
Dövlət müstəqilliyi bərpa olunduqdan sonra Azərbaycanı dünyanın əksər dövləti rəsmən tanıdı. Pakistanla Azərbaycan arasında qarşılıqlı etimada, etibara, ehtirama və inama əsaslanan ikitərəfli əlaqələr yarandı. Bu əlaqələrin şəbəkəsi genişləndi, sosial həyatın bütün sahələrini əhatələdi. İndi bu iki dövlət arasında siyasi, iqtisadi, mədəni münasibətlər yüksək səviyyədə dəvam etdirilir.Cari ilin 11 iyul tarixində Azərbaycan Respublikasının Prezidenti cənab İlham Əliyevin Pakistana dövlət səfəri də bunun təsdiqidir. Pakistanla Azərbaycan arasında əlaqələrin möhkəmləndirilməsinə dair 15 sənəd imzalanıb.Xarici işlər nazirləri arasında əməkdaşlığa dair Anlaşma Memorandumu, tranzit və preferensial ticarət, mineral ehtiyatlar və geologiya, informasiya texnologiyaları və kommunikasiyalar, elm və texnologiyalar, kiçik və orta sahibkarlıq və digər sahələr üzrə sazişlər, həmçinin 2024-2029-cu illər üzrə mədəni mübadilə proqramı imzalanıb. Yaxın illərdə ölkələr arasında bütün sahələr üzrə yüksək nəticə əldə olunacağı şübhəsizdir. Cənab Prezident İlham Əliyevin Pakistana dövlət səfəri də bu yöndə atılmış növbəti addım kimi qiymətləndirilir.
Azərbaycan və Pakistan arasında münasibətlər birgə tarix, mədəniyyət, din, həmrəylik və qarşılıqlı dəstək üzərində qurulub. Müşahidə edilən odur ki, Azərbaycan-Pakistan münasibətlərinin yüksələn xətlə inkişafına həm dövlətlər səviyyəsində qətiyyətli siyasi iradə nümayiş etdirilir, həm də buna cəmiyyətlərimizin böyük istəyi var. Azərbaycan Prezidenti cənab İlham Əliyevin dost, qardaş Pakistan İslam Respublikasına dövlət səfəri, ölkəmizin başçısına göstərilən ən yüksək hörmət və ehtiram iki dövlət arasında olan sarsılmaz tarixi bağların ifadəsidir. Azərbaycanla Pakistan arasında əməkdaşlıq perspektivləri kifayət qədər genişdir. İkitərəfli gündəliyə daxil olan bir çox məsələlər, eyni zamanda, regional proseslər, regional təhlükəsizlik məsələləri dialoq və müzakirə ilə daha yüksək səviyyədə inkişaf etdirilir. Hazırda Azərbaycan-Pakistan münasibətləri hər iki ölkənin dövlət rəhbərlərinin səyləri nəticəsində özünün ən yüksək inkişaf dövrünü yaşayır. Ölkəmizin Vətən müharibəsində qələbəsi və antiterror tədbirləri nəticəsində öz suverenliyini tam bərpa etməsi ilə Cənubi Qafqazda yaranan yeni reallıqlar və əməkdaşlıq imkanları ikitərəfli və çoxtərəfli əlaqələrin dərinləşməsi istiqamətində yeni perspektivlər açır. Azərbaycanda Pakistan şirkətləri sənaye, kənd təsərrüfatı, tikinti, ticarət, nəqliyyat və xidmət sahələrində aktiv fəaliyyət göstərirlər. Bu da ölkələr arasındakı dostluq və qardaşlığın ən bariz nümunəsidir.
Sailə Salahzadə
YAP Pirallahı rayon Təşkilatının fəalı