Azərbaycan-Rusiya münasibətləri dövlət başçılarının siyasi iradəsinə uyğun olaraq sürətlə inkişaf etdirilir
Azərbaycan və Rusiya Federasiyası arasındakı münasibətlərin çoxəsirlik tarixi vardır. Milyonlarla insanın taleyini bir-birinə bağlayan çoxəsrlik dostluq ənənələri, ortaq tarix və mədəniyyət dövlət başçılarının siyasi iradəsinə uyğun olaraq günü-gündən daha da sürətlə inkişaf edir. İkitərəfli əlaqələr nəinki diplomatik sahədə, həmçinin iqtisadi, mədəni və idman sahələrində möhkəmləndirilir. Onu da qeyd etmək lazımdır ki, Azərbaycan Respublikası ilə Rusiya Federasiyası arasında diplomatik münasibətlər 1992-ci il aprelin 4-də Bakıda imzalanan müvafiq protokol əsasında qurulub. Həmin ildə Azərbaycanın Rusiyada, Rusiyanın isə Azərbaycanda səfirlikləri fəaliyyətə başlayıb. İkitərəfli münasibətlərin müqavilə hüquqi bazasını təşkil edən əsas sənəd isə Rusiya Federasiyası ilə Azərbaycan Respublikası arasında 1997-ci il iyulun 3-də imzalanan “Dostluq, əməkdaşlıq və qarşılıqlı təhlükəsizlik haqqında” müqavilədir. Məhz bu müqavilənin imzalanmasından sonra iki ölkə arasında geniş əməkdaşlığın əsası qoyulub və dövlətlər arasında münasibətlərin daha da inkişaf etdirilməsi, əməkdaşlıq və təhlükəsizliyin təmin edilməsi üçün 200-dən çox ikitərəfli sənəd imzalanıb.
Prezident İlham Əliyevin cari ilin 22 aprel tarixində Moskvada Rusiya Federasiyasının Prezidenti Vladimir Putin ilə təkbətək görüşü də qarşılıqlı münasibətlərin inkişafına öz töhfəsini verib. Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin arasındakı görüşün əhəmiyyəti çox böyük olmaqla strateji münasibətlərin daha da dərinləşdirilməsinə töhfə verir, diplomatik, iqtisadi və idman sahəsindəki əməkdaşlığı möhkəmləndirir. Həm də ikitərəfli dostluğu təmin edir. Görüş zamanı Şimal-Cənub Nəqliyyat Dəhlizinin inkişafından, onun potensialının genişləndirilməsindən və bütövlükdə həm dəmir yolu, həm də avtomobil yolları vasitəsilə yükdaşımaların artmasından məmnunluq ifadə olundu. Humanitar sahədə əməkdaşlığın uğurla inkişaf etdiyi vurğulandı, bu baxımdan Azərbaycanda rus dilinə qayğı, xeyli sayda ali və orta təhsil müəssisəsində rus dilinin tədrisi qeyd edildi.
Otuz iki il ərzində iki ölkə arasında qazanılan böyük uğurlar nikbinlik və əminlik yaradır ki, Rusiya-Azərbaycan münasibətlərinin bundan sonra da durmadan inkişaf etdirilməsi xalqlarımızın köklü maraqlarının və amallarının reallaşmasına, hər iki ölkənin beynəlxalq nüfuzunun möhkəmlənməsinə şərait yaradacaq, Cənubi Qafqazda, habelə onun hüdudlarından kənarda sülhün və qarşılıqlı anlaşmanın dəstəklənməsinə müştərək töhfə olacaq.
İsmayıllı Aytac,
Xəzər rayonu, 216 nömrəli tam orta məktəbin müəllimi