COP29-a ev sahibliyi etmək Azərbaycan üçün həm böyük şərəf, həm də məsuliyyətdir

25-26 Aprel 2024-cü il tarixlərdə Azərbaycan Respublikasının Prezidenti İlham Əliyevin Almaniya Federativ Respublikasına işgüzar səfəri baş tutdu. Əsas məqsədi “15-ci Petersberq İqlim Dialoqu”nun Yüksək Səviyyəli Seqmentində iştirak olan səfər çərçivəsində dövlət başçımız Kansler Olaf Şoltsla, xarici işlər naziri Annalena Berbokla və  Prezident Frank-Valter Ştaynmayerlə görüşlər keçirdi. Bununla yanaşı, tədbirdən sonra Prezident İlham Əliyev və Almaniya Federativ Respublikasının Kansleri Olaf Şolts birgə mətbuat konfransında iştirak etdi. 

Məlumat üçün qeyd edək ki, Petersberq İqlim Dialoqu İqlim Dəyişikliyi Konfransına hazırlıq məqsədilə 2010-cu ildən bəri hər il ilin sonunda müəyyən ölkələri bir araya gətirən mötəbər tədbirlərdən biridir. Tədbir hazırda Berlində keçirilsə də, adını Bonndakı ilk konfrans məkanından götürüb. Bu il İqlim Dialoqunda 40-a yaxın ölkənin nümayəndələri iştirak edərək, iqlim dəyişikliyinə qarşı tədbirləri müzakirə ediblər.  

“15-ci Petersberq İqlim Dialoqu”nda COP29-a ev sahibliyi edəcək ölkə kimi Azərbaycanın yer alması, Azərbaycan Prezidentinin bu tədbirdə iştirakı bir daha ölkəmizin iqlim dəyişikliyi ilə bağlı məsələlərdə atdığı addımları, mövcud siyasətini dünya ictimaiyyətinə təqdim etməsinə imkan verdi. Həmin beynəlxalq platformadan məharətlə istifadə edərək Prezident İlham Əliyev faydalı qazıntı yataqları ilə zəngin olan ölkə kimi Azərbaycanın qlobal yaşıl gündəliyin icrasında əhəmiyyətli rolunu ortaya qoydu, iqtisadiyyatın dekarbonizasiyası, habelə alternativ enerjidən səmərəli istifadə strategiyasını xüsusi vurğuladı. Nəzərə alsaq ki, Azərbaycan son illərdə Avropa İttifaqı üçün əsas təbii qaz təchizatçısına çevrilib, alternativ enerjinin əldə olunması üçün görülən tədbirlər, ölkə başçısının qeyd etdiyi kimi, Avropaya lazım olan böyük həcmdə təbii qaza qənaət etmək üçün şərait yaradacaqdır.

Ölkə başçımız tədbirdəki nitqi zamanı onu da vurğuladı ki, Azərbaycan müxtəlif qitələrin ölkələri arasında körpülər salmaq və ya onları gücləndirmək, eləcə də onların həmrəyliyini möhkəmləndirmək imkanını yaradacaq. Ölkəmizin müxtəlif dövrlərdə rəhbərlik etdiyi beynəlxalq təşkilatlara sədrlik bu iddianın reallaşmasında effektiv rol oynayacaqdır. Xüsusilə, üzvlərinin sayına görə BMT-dən sonra ikinci ən böyük təşkilat olan Qoşulmama Hərəkatına uğurlu sədrlik dövrü Azərbaycanın dünyadakı mövqelərini gücləndirmiş və bir çox ölkələrlə məhsuldar münasibətlərin qurulmasına şərait yaratmışdır. Tədbir çərçivəsində Azərbaycanın öncəki (Birləşmiş Ərəb Əmirlikləri) və sonrakı (Braziliya) COP ölkələri ilə birgə  “üçlük” olaraq fəaliyyət göstərəcəyi də vurğulandı və qeyd edildi ki, məhz bu istiqamətdə olan format uzunmüddətlidir.

Beləliklə, bu gün fəxarətlə deyə bilərik ki, 1994-cü ildə “Əsrin müqaviləsi”nə imza atan, dünyada etibarlı neft-qaz ölkəsi kimi tanınan Azərbaycan hazırda dördüncü sənaye inqilabının baş verdiyi bir dövrdə özünün energetika siyasətini uğurla “yaşıl” enerji, “yaşıl” iqtisadiyyat siyasətinə transformasiya edir, dünyada enerji təhlükəsizliyinin təmin edilməsində yaxından iştirak edir.

 

Məmmədzadə Məmmədcəfər

RİH başçısı Aparatının məsul əməkdaşı