Xəzər Rayon İcra Hakimiyyətinin və YAP Xəzər rayon təşkilatının birgə təşkilatçılığı ilə “Abşeron” sanatoriyasının konfrans zalında Ümummilli lider Heydər Əliyevin anadan olmasının 101 illiyinə həsr olunmuş dəyirmi masa keçirilib.

“Gununxeberi.az ” xəbər verir ki, tədbirdə Xəzər RİH başçısı Elşən Salahov, Millət vəkilləri Rauf Əliyev, Jalə Əhmədova, Aydın Hüseynov, YAP Xəzər rayon təşkilatının sədri Namiq Əhmədov, idarə və müəssisələrinin rəhbərləri, RİH başçısı Aparatının əməkdaşları və şəhid ailələri iştirak ediblər.

Tədbirdə çıxış edən Xəzər Rayon İcra Hakimiyətinin başçısı Elşən Salahov, YAP Xəzər rayon təşkilatının sədri Namiq Əhmədov, Milli Məclisin deputatları Rauf Əliyev, Jalə Əhmədova və Aydın Hüseynov, Milli Aviasiya Akademiyasının dekanı Nazim Nağıyev, Rayon Ziyalılar Cəmiyyətinin sədri Təvəkkül Səlimov, Vətən müharibəsi qəhrəmanı şəhid Elçin Mansurovun anası Məleykə Məcidova Ümummilli lider Heydər Əliyevin mənalı həyatı və misilsiz xidmətlərindən söz açaraq Azərbaycan xalqının tarixində və dövlətçilik fəaliyyətində müstəsna xidmətlərindən danışıblar. 1969-cu ildən onun Azərbaycana rəhbər seçilməsi, tariximizə ölkəmizin sürətli və uzunmüddətli inkişafının əsasını qoyması kimi daxil olduğunu və ölkəmizin son onilliklər ərzində qazandığı uğurların Ümummilli liderin adı ilə bağlı olduğunu vurğulayıblar.

Mövzu əsasında fikirlərini bölüşən qonaqlar istər sovetlər dövründə, istərsə də müstəqillik illərində respublikaya rəhbərlik edən və ömrünü öz xalqına həsr edən Heydər Əliyevin Azərbaycan xalqının qəlbində əbədi yaşayacağını vurğulayaraq müasir və müstəqil Azərbaycan dövlətinin bugün də Prezident İlham Əliyevin müdrik rəhbərliyi altında uğurla inkişaf etdirildiyini qeyd ediblər.

Tədbirlərin davamı olaraq Xəzər Rayon İcra Hakimiyyətinin və YAP Xəzər rayon təşkilatının birgə təşkilatçılığı ilə Buzovna qəsəbəsi, Zuğulba sarayda “Əbədiyaşar dahi” adlı tədbir keçirilib.

Xəzər RİH başçısı Elşən Salahov, Millət vəkilləri Musa Quliyev, Jalə Əhmədova, Afət Həsənova və Fatma Yıldırım, YAP Xəzər rayon təşkilatının sədri Namiq Əhmədov, RİH başçısının müavinləri, RİH başçısı Aparatının şöbə müdirləri, şəhid ailələri, təhsil, səhiyyə, idarə və müəssisələrin rəhbərlərinin iştirakı ilə baş tutan tədbirdə ilk öncə Azərbaycan Respubikasının dövlət himni səsləndirililib və Ümummilli lider Heydər Əliyevin və ölkəmizin ərazi bütövlüyü naminə canından keçən şəhidlərimizin əziz xatirələri bir dəqiqəlik sükutla yad edilib.

Daha sonra tədbir iştirakçıları Ümummilli lider Heydər Əliyevin həyat və fəaliyyətinə həsr olunmuş filmə baxıblar.

Tədbirdə Xəzər Rayon İcra Hakimiyətinin başçısı Elşən Salahov, Milli Məclisin deputatı Musa Quliyev və YAP Xəzər rayon təşkilatının sədri Namiq Əhmədov çıxış edərək öz taleyini Azərbaycanın dövlətçilik və tərəqqi salnaməsinə çevirən Ulu Öndər Heydər Əliyevin ömrünün bütövlükdə Azərbaycan dövlətinin inkişaf tarixinin parlaq bir hissəsi olduğunu qeyd ediblər. Ulu Öndərin həyat fəaliyyətindən danışan natiqlər dahi şəxsiyyətin Azərbaycanın bugünü və gələcəyi üçün möhkəm təməl yaratdığını, məhz bu möhkəm təməl üzərində ucalan müasir Azərbaycanın davamlı uğurları ilə dünyanın diqqət mərkəzində olduğunu və Heydər Əliyevin müəyyənləşdirdiyi milli dövlətçilik kursunun Prezident İlham Əliyev tərəfindən davam etdirilməsi bu siyasətin böyük uğuru olduğunu vurğulayıblar.

Tədbir zamanı Ümummilli lider Heydər Əliyevin anadan olmasının 101-ci il dönümünün şərəfinə rəngarəng musiqi proqramı və ziyafət təşkil olunub, sonda xatirə şəkili çəkilib.