Müstəqil siyasət aparan iki ölkə: Slovakiya və Azərbaycan
Ölkəmizin xarici siyasətində Avropa İttifaqı ilə əlaqələrin möhkəmləndirilməsi daim prioritet istiqamətlərdən biri olmuşdur. Məhz bunun nəticəsidir ki, Azərbaycanla Avropa İttifaqına daxil olan ölkələr arasında münasibətlər hər ötən gün yeni və daha yüksək inkişaf mərhələsinə yüksəlməkdədir. Dövlət başçıları səviyyəsində qarşılıqlı səfərlər bu münasibətlərdə yeni səhifələrin açılmasına gətirib çıxarmışdır. Bu çərçivədə Slovakiya ilə əlaqələrimizin də tarixi inkişaf mərhələsində olduğunu desək yəqin ki yanılmarıq.
Slovakiya Respublikasının Baş naziri Robert Fitso 07 may 2024-cü il tarixdə geniş nümayəndə heyəti ilə birgə ölkəmizə bir günlük səfər etdi. Səfərin müddəti qısa olsa da məhsuldarlıq baxımından olduqca yetərli idi. İlk öncə qeyd edək ki, səfər yalnız dövlət rəsmilərinin görüşü ilə yekunlaşmırdı. Bununla yanaşı, baş nazir R.Fitso Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etdi, “Əbədi məşəl” abidəsinin önünə əklil qoydu. Sonda Bakının ən hündür nöqtəsindən paytaxtımızın mənzərəsini seyr edən qonağa Şəhidlər xiyabanının tarixi və şəhərdə görülən abadlıq-quruculuq işləri barədə məlumat verildi.
Səfərin əsas hissəsində isə dövlət başçıları təkbətək və geniş tərkibdə görüşlər keçirdi və mətbuata bəyanatlarla çıxış etdi. Burada iki dövlətin liderlərinin bir-birlərini səmiyyətlə qarşılaması və dövlətlərin mövqelərinin bənzər olduğunu vurğulaması xüsusi diqqət çəkdi. Bildirildi ki, Slovakiya-Azərbaycan əlaqələrinin çox gözəl gələcəyi var. Həm siyasi, həm iqtisadi, həm də enerji, sənaye istehsalı sahələrində əməkdaşlığın perspektivləri müsbətdir. Azərbaycan Prezidenti çoxtərəfli görüşdə baş nazir R.Fitsonun səfərinin əlaqələrimizin yeni səhifəsini açacağını qeyd etdi. Fitso isə öz növbəsində iki ölkəni birləşdirən bir çox məfhumların, birgə məqamlar olduğunu qeyd etdi və əlavə etdi ki, Slovakiya Avropa İttifaqına üzv ölkə olmasına baxmayaraq, iki ölkəni birləşdirən praqmatik yanaşmadır. Sitat: Bizi birləşdirən suveren xarici siyasətdir. Eyni zamanda, bizi o fakt birləşdirir ki, biz dünyaya hər dörd istiqamətdə baxırıq, yalnız Qərb və ya bir istiqamətdə köklənmirik. Biz beynəlxalq hüquqa hörmətlə yanaşırıq. Əlbəttə ki, başqalarının işlərinə müdaxilə olunmaması, ərazi bütövlüyünün aliliyi bizim üçün ən başlıca amillərdir.
Daha sonra iki ölkə lideri sənədlərin imzalanması mərasimində iştirak etdi. Burada Azərbaycan və Slovakiya arasında strateji tərəfdaşlıq haqqında Birgə Bəyannamə ilə yanaşı hərbi-texniki və müdafiə sahələrində sazişlər imzalandı. İki ölkənin müdafiə və müdafiə sənayesi sahələrində əməkdaşlığı dərinləşdirmək barədə razılığa gəlməsi münasibətlərin yeni mərhələyə keçdiyini deməyə imkan verir. Qlobal təhlükələr fonunda hərbi sahədə əməkdaşlıq hər iki ölkənin təhlükəsizliyi baxımından olduqca mühüm əhəmiyyət kəsb edir. Bununla bağlı, dövlət başçımız bildirdi ki, müdafiə sənayesi sahəsində birgə istehsal sahələrinin yaradılması haqqında artıq konkret danışıqlara start verilmişdir. Dövlət başçımızın nitqində vacib nüanslardan biri də heç şübhəsiz, Slovakiya şirkətlərinin Qarabağda bərpa və yenidənqurma prosesində iştirak etməsi ilə bağlı dedikləri idi. Vurğulandı ki, Ağdamın Qərvənd kəndi Slovakiya şirkətləri tərəfindən yenidən qurulacaq. Bu rəmzi məna daşıyır. Bəli, nəzərə alsaq ki,Qarabağda yalnız Azərbaycana dost ölkələr fəaliyyət göstərir onda dərk etmək olur ki, Slovakiya Azərbaycan əlaqələri həqiqətən də inkişaf mərhələsindədir.
Slovakiya Baş nazirinin səfəri zamanı verilən mesajlardan aydın oldu ki, müstəqil siyasət aparan Azərbaycan və Slovakiya bu gün suverenlik və ləyaqət əsasında qurulmuş siyasətlə idarə olunurlar. Avropa İttifaqının üzvü olmasına baxmayaraq, Slovakiya Aİ-nin digər ölkələrin daxili işlərinə qarışmasının əleyhinədir. Eyni zamanda, rəsmi Bratislava Bakı ilə Avropa İttifaqı arasında körpü olmağa hazırdır. R.Fitso Azərbaycandakı obyektiv vəziyyəti Avropa İttifaqına təqdim etmək niyyətini də bəyan etdi. Bu da ikitərəfli münasibətlərdə sağlam yanaşmanın göstəricisidir.
Arzu Cahangirova
Azərbaycan Təhsil İşçiləri Azad Həmkarlar İttifaqının
Pirallahı Rayon Komitəsinin sədri