Azərbaycan – Slovakiya əlaqələri yeni mərhələdə
Azərbaycan – Slovakiya əlaqələri yeni mərhələdə
07 May 2024-cü il tarixdə Slovakiya Respublikasının Baş naziri Robert Fitso geniş nümayəndə heyəti ilə birgə ölkəmizə səfər etdi. Məhsuldar keçən görüş çərçivəsində iki dövlətin liderləri təkbətək və geniş tərkibdə görüşlər keçirdi, vacib sənədlər imzaladı və mətbuata bəyanatlarla çıxışlar etdi.
Qeyd edək ki, iki ölkə arasındakı diplomatik əlaqələr 1993-cü ilin noyabr ayında qurulsa da ikitərəfli münasibətlərin genişlənməsində Prezident İlham Əliyevin bu ölkəyə 2004-cü ildə etdiyi işgüzar səfər böyük rol oynayıb. Bu gün isə Azərbaycan ilə Slovakiya arasında münasibətlər artıq yeni, daha yüksək səviyyəyə çatmaq üzrədir. Bu baxımdan 7 may tarixli Slovakiya Respublikasının Baş naziri Robert Fitsonun Azərbaycana rəsmi səfəri xüsusi əhəmiyyət kəsb etməkdədir. Səfər çərçivəsində imzalanan Strateji Tərəfdaşlıq haqqında Bəyannamə isə iki ölkənin münasibətlərinin yeni mərhələyə qalxmasının əyani təsdiqidir. Dövlət başçımız İlham Əliyev imzalanan sənədi yüksək qiymətləndirmiş və demişdir: Strateji tərəfdaşlıq Bəyannaməsində əks olunan maddələr bizim niyyətimizi əks etdirir, eyni zamanda, gələcək əməkdaşlığın perspektivlərini də müəyyən edir.
Ümumilikdə səfəri daha çox iqtisadi məqsədlərə qulluq edən səfər olaraq adlandırmaq olar. İki liderin çıxışlarından və baş nazir Robert Fitsonun AZƏRTAC-a və AzTV-yə müsahibəsindən bu qənaətə gəlmək olar ki, səfər çərçivəsində ümumilikdə üç istiqamətdə müzakirələr aparılıb. Bunlar Slovakiyanın Qarabağdakı yenidənqurma işlərində maraqlı olması, hərbi sənaye sahəsində əməkdaşlıq və Azərbaycan təbii qazının Slovakiyaya idxalı ilə bağlıdır. Hazırda iki dövlət arasında ticarət dövriyyəsi bir o qədər yüksək olmasa da gələcək üçün böyük perspektivlər mövcuddur. Ona görə ki, iki dövlətin mövqeləri bir-biri ilə tam uyğundur.
Nəzərdə tutulan hər üç sahə vacib və strateji olsa da burada xüsusilə Slovakiya şirkətlərinin Qarabağdakı bərpa prosesində iştirak etmək istəyi diqqətimizi cəlb edir. Yəqin ki, hər birimiz xatırlayırıq ki, 2020-ci Azərbaycanın Qarabağda əldə etdiyi böyük zəfərdən sonra Prezident İlham Əliyev bildirmişdi ki, bərpa işlərinə yalnız dost ölkələrdən olan şirkətlər dəvət ediləcək. Bu gün gəldiyimiz vəziyyətdə Slovakiya şirkətlərinin də bu prosesdə iştirak etməsi iki ölkənin bir-birinə olan etimadının səviyyəsini ortaya qoyur. Beləliklə, Ağdamın Qərvənd kəndinin Slovakiya şirkəti tərəfindən yenidən qurulması böyük rəmzi məna daşıyır.
Digər bir tərəfdən hərbi sahədə iki ölkənin əməkdaşlığının genişləndirilməsi də olduqca vacibdir. Bu gün Azərbaycan bölgədə və dünyada sülh üçün çalışsa da məlumdur ki, Ermənistana güvənmək heç də asan deyil. Xüsusilə də ölkə daxilində seperatizm meyillərinin hər an baş qaldıra biləcəyi bir fonda Azərbaycan daim güclü olmalı, Ordusunu ən yüksək səviyyədə etməlidir. Slovakiya ilə bu sahədə əməkdaşlıq şübhəsiz ki, Azərbaycan Ordusunu daha da gücləndirəcəkdir.
Ümumilikdə Azərbaycanla Slovakiya arasında bütün sahələrdə münasibətlərin inkişaf etdirilməsi istiqamətində atılan addımlar yüksək nəticələrin əldə olunacağına əsas verir. Bu səfər onu göstərdi ki, rəsmi Bratislava Cənubi Qafqazın ən aparıcı və perspektivli ölkəsi sayılan Azərbaycanla əməkdaşlığı dərinləşdirmək üçün səylərini daha da artırmaq niyyətindədir. Əminliklə demək olar ki, Azərbaycan və Slovakiya iki müstəqil siyasət aparan ölkə olaraq qarşılıqlı dostluq və əməkdaşlıq əlaqələrini ən yüksək səviyyədə uğurla davam etdirəcəkdir.
Ülkər Mirzəmətova
YAP Pirallahı rayon təşkilatının fəalı
