Hüseynbala Mirələmova Türkiyənin ASES təşkilatının xüsusi mükafatı təqdim edildi — FOTO

Mayın 2-də Bakıda Atatürk Mərkəzində  Türkiyənin  Egetim və Bilim Çalışmaları Akademiyasının (ASES) Kongre və Orqanisyon Yayınçılıq  təşkilatının yazıçı-dramaturq Hüseynbala Mirələmova "Bilim və türk dünyasına katkı və dəstəklərinə” görə xüsusi mükafatının təqdimat mərasimi keçirildi. 

Təqdimat mərasimində  Atatürk Mərkəzinin direktoru, Milli Məclisin deputatı, filologiya elmləri doktoru , Əməkdar  elm xadimi AMEA-nın həqiqi üzvü  professor Nizami Cəfərov, Milli Məclisin deputatı, ”Azərbaycan” qəzetinin baş redaktoru Bəxtiyar Sadıqov, filologiya elmləri doktoru, professor Minaxanım Təkləli, filologiya elmləri doktoru, professor İslam Qəribli, Türkiyədən gələn qonaqlardan  professor, doktorlar  Çengiz Şahin, Mustafa Talas, Lokman Zor, ASES-in prezidenti Taner Əli Söyləməz və digər şəxslər iştirak edirdilər. 

Təqdimat mərasimini ADPU-nun Azərbaycan ədəbiyyatı tarixi kafedrasının professoru, "Türk odası” və "Türk araşdırmaları”  elmi-tədqiqat mərkəzinin rəhbəri, filologiya elmləri doktoru, professor  Elman Quliyev açaraq bildirdi ki, Azərbaycanda kifayət qədər yaxşı tanınan  yazıçı-dramaturq Hüseynbala Mirələmovun ədəbi  yaradıcılığı qardaş Türkiyədə də sevilə-sevilə izlənir. Yazıçının  bir neçə əsəri artıq türk oxucuları tərəfindən sevilə-sevilə oxunur və yüksək dəyərləndirilir. 

Natiq Hüseynbala Mirələmovun ədəbi fəaliyyəti haqqında geniş məlumat verərkən bidlirdi ki, yazçının son illərdə nəşr olunan "Yurda fəda üç paşa” seriyasında olan  "Ənvər paşa” əsəri ötən il  Türkiyə türkcəsində işıq üzü görüb və  qardaş ölkədə geniş yayılıb.  Bu ilin mart ayında isə yazıçı Hüseynbala Mirələmovun Türkiyənin bir neçə şəhərində oxucularla maraqlı və yaddaqalan görüşləri keçirilib.  

Toplantıda çıxış edən professor Nizami Cəfərov, Milli Məslisin deputatı Bəxtiyar Sadıqov, professorlar  İslam Qəribli, Minaxanım Təkləli və türkiyəli qonaqlar yazıçının ədəbi yaradıcılığı, elmi- siyasi və ictimai fəaliyyəti haqqında söhbət açaraq bildirdilər ki, Hüseynbala Mirələmov ədəbi-siyasi yaradıcılığı  ilə Türkiyə – Azərbaycan dostluğunun möhkəmlənməsinə,  bu iki dövlətin xalqlarını birləşdirən ortaq dəyərlərin təbliğ olunmasına  çox  qiymətli töhfələr verib. Bu gün Türkiyənin ASUS təşkilatının Hüseynbala Mirələmova təqdim etdiyi bu mükafat  onun bu sahədəki  ədəbi fəaliyyətinə verilən yüksək qiymətdir. 

Sonra Türkiyəli qonaq ASES-un prezidenti Taner Əli Söyləməz mükafatı yazıçı dramaturq Hüseynbala Mirələmova təqdim etdi. Təbrik çıxışında yazıçıya yaradıcılığında yeni uğurlar arzulayan Taner Əli Söyləməz əmin olduğunu bildirdi ki, Hüseynbala Mirələmov ərsəyə gətirəcəyi növbəti əsərləri ilə ortaq tariximizin bir çox qaranlıq məqamlarına da işıq salmaqla iki dövlət, bir millət arasında  qardaşlıq münasibətlərinin yeni səviyyəyə qalxmasına dəyərli töhfələr verəcək. 

Mərasimin sonunda çıxış edən yazıçı-dramaturq Hüseynbala Mirələmov tədbirdə iştirak edənlərə, onun uğurlarına sevinənlərə və yüksək dəyər verənlərə minnətdarlıq edərək bildirdi ki, türk qardaşlarının ona təqdim etdikləri bu mükafat onu daha böyük həvəslə işləməyə və əsərlər yazmağa sövq edir.