Azərbaycan – Almaniya dostluq əlaqələri yüksək səviyyədə davam edir
Azərbaycanın Avropada ən vacib siyasi-iqtisadi tərəfdaşlarından olan Almaniya ilə əlaqələrinin inkişafı həm ölkələrimiz, həm də bütövlükdə, Cənubi Qafqazın inkişafı və sabitliyi üçün çox böyük əhəmiyyət kəsb edir. 30 ildən artıq zaman ərzində iki ölkə arasında qurulan diplomatik münasibətlər yüksələn xətlə inkişaf edir və müxtəlif sahələrdə əməkdaşlıq sürətlə davam etdirilir.
Azərbaycan Respublikasının Prezidenti cənab İlham Əliyevin Almaniya Federativ Respublikasının Federal Kansleri Olaf Şoltsun dəvəti ilə “15-ci Petersberq İqlim Dialoqu”nun Yüksək Səviyyəli Seqmentində iştirak etmək üçün aprelin 25-də Füzuli şəhərindən Almaniyaya işgüzar səfəri iki ölkə arasında əlaqələrin daha da möhkəmlənməsinə bir təkan oldu.
Ölkəmizin Prezidenti cənab İlham Əliyevin Berlində Almaniya Federativ Respublikasının Kansleri Olaf Şolts ilə təkbətək görüşü, Almaniya Federativ Respublikasının xarici işlər naziri Annalena Berbok ilə görüşü, “15-ci Petersberq İqlim Dialoqu”nun Yüksək Səviyyəli Seqmentində çıxışı, bir-birindən əhəmiyyətli görüşləri bir daha deməyə əsas verir ki, dünya ölkələri arasında böyük siyasi nüfuza və güclü iqtisadiyyata sahib olan Azərbaycanla Almaniya arasında dostluq əlaqələri yüksək səviyyədə davam edir.
Dövlət başçımız iştirakçılar tərəfindən böyük maraqla qarşılanan “15-ci Petersberq İqlim Dialoqu”ndakı çıxışında Almaniyanın COP29-la bağlı Azərbaycana göstərdiyi dəstəyə də toxunaraq bildirib ki, COP29-a ev sahibliyi edəcək ölkə kimi yekdil qərarla seçilmək bizim üçün həqiqətən böyük şərəfdir. Biz bunu beynəlxalq ictimaiyyətin Azərbaycana və gördüyümüz işlərə, o cümlədən yaşıl enerji sahəsindəki fəaliyyətimizə hörmətinin əlaməti hesab edirik. Nəhayət bu, böyük məsuliyyətdir, çünki biz nəinki yaxşı tədbir təşkil etməli, o cümlədən yaxşı nəticələrə nail olmalıyıq. Hesab edirəm ki, Azərbaycanın müxtəlif beynəlxalq təşkilatlarla beynəlxalq əlaqələri və onlarda fəal iştirakı bizə müxtəlif qitələrin ölkələri arasında körpülər salmaq və ya onları gücləndirmək, eləcə də onların həmrəyliyini möhkəmləndirmək imkanını yaradacaq.
Qalib ölkəmizin Qalib Lideri İlham Əliyev “15-ci Petersburq İqlim Dialoqu”nda çıxışı zamanı Azərbaycan-Ermənistan münasibətlərinin normallaşması prosesinə də toxunaraq vurğulayıb ki, Azərbaycanın sülh gündəliyinin irəli aparılması üçün səylərini bundan sonra da davam etdirəcək. Ermənistanla sülh müqaviləsinin imzalanmasına daha yaxın olduğumuzu, Almaniyada keçirilmiş xarici işlər nazirlərinin rəhbərlərinin görüşünün bu prosesə töhfə verdiyini, 4 kəndimizin qaytarılmasını, sərhədlərin delimitasiyası prosesinə start verildiyini və Qazaxıstanda yenidən görüşərək sülh müqaviləsi layihəsinin müzakirə ediləcəyini diqqətə çatdıran Prezident cənab İlham Əliyev ölkəmizin sülh gündəliyinə sadiq olduğunu bildirib.
Azərbaycanın yaşıl enerji istehsalı sahəsində böyük layihələrə imza atdığını vurğulayan Prezident cənab İlham Əliyev çıxışında onu da diqqətə çatdırıb ki, biz xarici tərəfdaşlar və sərmayədarlarla yaşıl keçid üzrə artıq nəhəng layihələrə başlamışıq. Bu il Azərbaycanda “Yaşıl dünya naminə həmrəylik ili” elan edilib. Yalnız bu il ərzində 1300 meqavat Günəş və külək enerjisini istehsal etmək imkanını yaradacaq enerji stansiyalarının təməlqoyma mərasimi keçiriləcək. 2027-ci ilin sonuna qədər ümid edirik və əslində, müqavilələr imzalandığına görə əminik ki, 2000 meqavat Günəş və yaşıl enerji imkanlarımız olacaq. Doqquz elektrik enerjisi stansiyası olacaq və 2030-cu ilə qədər əlavə 10 Günəş və külək enerjisi stansiyaları qurulacaq ki, onların gücü 5000 meqavat (5 qiqavat) təşkil edəcək. Bu potensialdan istifadə edərək, biz qaz istehlakımızı əksər hissədə elektrik enerjisi istehsalı ilə əvəzləyəcəyik. Həcmlərə gəldikdə isə düşünürəm ki, Avropaya ən azı əlavə 5 milyard kubmetr qaz ixrac olunacaq. Bir sözlə, bu, əslində, hər kəs üçün uduşlu variantdır.
Ölkə Prezidentimizin Almaniyaya səfəri Cənubi Qafqazda sülh və əməkdaşlığın sürətlənməsinə təkan olmaqla, yanaşı Azərbaycanın növbəti tarixi uğurudur.
Bayram Aslanov,
YAP İdarə Heyətinin üzvü, YAP Gəncə şəhər təşkilatının sədri
