“Azərlotereya” öz gəlirlərini fikirləşir — Deputatdan SƏRT AÇIQLAMA
Son zamanlar ölkədə məşhurlaşan “Azərlotereya” ASC tərəfindən keçirilən “Poz, qazan” lotereyası ilə bağlı şikayətlər artıb. Şəhərin mərkəzi küçələrində, avtobus dayanacaqlarında, metro çıxışlarında satılan lotereyalara xüsusən kasıb təbəqədən olan vətəndaşların üz tutduğunun şahidi oluruq. Qalib gəlmək arzusu ilə günə 20 manat , hətta daha çox itirən insanlar olur.
Məsələ ilə bağlı News24.az-a açıqlama verən Milli Məclisin deputatı Tahir Rzayev bildirib ki, bu mövzuda hər iki tərəf özünün mənafeyi baxımından çıxış edir. Deputatın sözlərinə görə, bu məsələdə “Azərlotereya” ancaq özünün gəlirlərini düşünür:
“Heç kim istəməz ki, uduzsun. Buna görə də, lotereyaların buraxılması, uduşa getməsi müəyyən şəxsləri belə şirnikləşdirir. Ancaq bu riskli bir oyundur. Bütün uduşlar qumar və digər bu kimi oyunlar risk tələb edir. Əlbəttə ki, burada müəyyən çətinliklər, problemlər var. İnsanlar da bir çox hallarda istəyirlər ki, qazansınlar. Ancaq onların hamısı böyük məbləğ qazansaydı, heç “Azərlotereya” bu oyunu təsdiqləməzdi. Məntiqlə düşünsək, “Azərlotereya” özünün gəlirlərini düşünür, insanlar isə istəyir ki, qazansınlar".
Deputat hesab edir ki, insanlar belə oyunlara çox alüdə olmamalıdır.
"Şahidiyəm, elə insanlar var ki, maşınını satır, bəziləri evini satır və belə oyunlara aludəçilik nümayiş etdirirlər. Uzun müddət əllərinə gələn vəsaiti, hətta əmək haqlarını, qohum-əqrabadan borc alıb bu kimi oyunlara yatırırlar. Məsləhətim budur ki, ehtiyatlı olsunlar. Mən "Azərlotoreya"nı qınaya bilmərəm, ya da onun əleyhinə də bir söz demək fikrində deyiləm. Çünki bu uduşdur. İki pəhləvan döşək üzərinə çıxır və təbii ki, onun biri udmalıdır. İki boksçu rinqə girir, onun biri udmalıdır. Futbol oyunu gedir, orada kimsə qalib gəlməlidir. Bu da uduşdur, hər kəs özünün tərəfini ortaya qoyub".
Mehriban Mirzəzadə
